‘కుక్కపిల్ల దొరికింది’ - ఇది రావికొండలరావు గారి నాటిక అనుకుంటాను. ఆంధ్ర మహిళా సభ వారి హాలులో అనుకుంటాను. నాటికల పోటీలు జరిగాయి. అన్నట్లు జ్ఞాపకం. కానీ ఈ నాటకంలో ‘రాజబాబు’ నటన అమోఘం. బహుశ అదే రాజబాబుకి అద్భుతమయిన సినిమా ఛాన్స్‌కి, సినిమా కెరీర్‌కి ఆరంభం అయిందేమో. ‘పాన్‌గల్ పార్క్’కి ఎదురుగుండా ‘చిత్ర’ పత్రిక నరసింహారావుగారి కార్యాలయం, ప్రెస్సు.

కామరాజ నాడార్ అరవై మూడు దాకా తమిళనాడు చీఫ్ మినిస్టర్‌గా ఒక ‘దేముడే’ అన్నట్లుగా పరిపాలించాడన్నది స్థానిక జనవాక్యం. ‘కర్మవీరుడు’ అంటారు జనాలు. మద్రాసు తర్వాత పెద్ద నగరం కోయంబత్తూరే. అక్కడా తెలుగువారిదే రెండో స్థానం. మనవేపు కోయంబత్తూరు ‘హండ్రెడ్ కౌంట్’ నేత చీరలకు విపరీతమయిన గిరాకీ.

కోడి ఒక కోనలో పిల్లలొక కోనలో అన్నట్లుగా ఎడం, దూరం అయిపోయింది బాగా ఆంధ్రపత్రిక - ఆంధ్రప్రదేశ్‌కి. నేను చేరేటప్పటికి ఆరు పేజీలు ఏడు నయాపైసలకి - పది పేజీలు ఆదివారం నాడు - పదమూడు నయా పైసలకి దొరికే పత్రికని, అందితే తెలుగువాడున్న ప్రతీ గ్రామం, ప్రతీ మూలా కళ్లకద్దుకుని అందుకునే వాళ్లే గానీ - అది అందటమే ప్రధాన సమస్య.

తంబుచెట్టి వీధి అంత నిడివి గల రోడ్డే అయినా ‘వన్ వే రోడ్డు’ కావడంతో, నేను రోడ్డు క్రాస్ చేసి - ఆం.ప్ర.లోకి ప్రవేశిద్దామని చూస్తున్నప్పటికీ, ఆ కొస దాకా ఎడం వేపు అంతా కండచీమల బారులాగా మోటారు శకటాలు ఓ ‘కునుకు’ తీయడానికి సిద్ధంగా ఉన్నాయి. లాగి వదిలిన బాణం లాగా నేను ఆఫీసులోకి దూసుకుపోతూనే, ఓ కన్ను టైమ్‌కీపర్ గోడ గడియారం మీద వేశాను. పైకి హాలులోకి చేరేసరికే, నా బల్ల నిండా టెలిగ్రాములు పలకరిస్తున్నాయి.