నొయిడా: ఈ ఏడాది జనవరి 15 తర్వాత వివిధ దేశాల నుంచి భారత్‌కు తిరిగివచ్చిన వారిని ముందు జాగ్రత్త చర్యగా వైద్య పరీక్షలకు అధికారులు తరలించారు. 373 మందికి పరీక్షలు నిర్వహించారు. కేంద్ర ఆరోగ్య మంత్రిత్వ శాఖ ఆధ్వర్యంలో ఈ వైద్య పరీక్షలు జరిగాయి. ఇప్పటివరకు పరీక్షించిన వారిలో 55 మందికి ఈ వైరస్ ఉండవచ్చునని అనుమానిస్తున్నారు.

న్యూఢిల్లీ, మార్చి 4: ఢిల్లీలో ఇటీవల చెలరేగిన అల్లర్లపై వెంటనే చర్చ జరపాలంటూ ప్రతిపక్షం పట్టుపట్టి గొడవ చేయడంతో బుధవారం పార్లమెంటు ఉభయ సభలు వాయిదాలు, గొడవ, గందరగోళం మధ్య గురువారానికి వాయిదా పడ్డాయి. లోకసభ మూడు వాయిదాలతో దాదాపు తొమ్మిది నిమిషాలు మాత్రమే కొనసాగింది. రాజ్యసభ సమావేశం ప్రారంభమైన కొన్ని నిమిషాలకే రేపటికి వాయిదా పడింది.

దేశంలో తాజాగా ప్రమాదకర కరోనా వైరస్ కేసులు బయటపడిన నేపథ్యంలో దేశ రాజధాని ఢిల్లీ సహా అంతటా జనం అప్రమత్తం అయ్యారు. పౌరుల నుంచి వైద్యుల వరకు ముఖానికి రక్షిత మాస్క్‌లు ధరిస్తేగానీ వీధుల్లోకి రావడం లేదు. ఆగ్రాలోని తాజ్ సందర్శనకు వచ్చిన టూరిస్టులు సైతం రక్షిత మాస్క్‌లతోనే ఈ అందాల సౌధాన్ని వీక్షించారు. ఈ దృశ్యాలు ప్రాణాంతక వైరస్ పట్ల ప్రజల అప్రమత్తతను
చాటిచెబుతున్నాయి.

న్యూఢిల్లీ, మార్చి 3: ఢిల్లీలో అల్లర్లకు పాల్పడిన వారిని ఏ కోశాన వదిలి పెట్టకుండా కఠినంగా శిక్షించాలని ‘ఆప్’ అధినేత, ఢిల్లీ ముఖ్యమంత్రి అరవింద్ కేజ్రీవాల్ ప్రధాని నరేంద్ర మోదీని కోరారు. పార్టీలకు అతీతంగా చర్యలు తీసుకోవాలని ఆయన కోరారు. ముచ్చటగా మూడోసారి ముఖ్యమంత్రిగా బాధ్యతలు చేపట్టిన తర్వాత అరవింద్ కేజ్రీవాల్ మంగళవారం ప్రధాని మోదీని కలుసుకోవడం ఇదే ప్రథమం.