న్యూఢిల్లీ, నవంబర్ 25: జాతీయ కోచ్ స్టీఫెన్ కాన్‌స్టాంటైన్‌ను వచ్చే ఏడాది మార్చి వరకూ కొనసాగించాలని అఖిల భారత ఫుట్‌బాల్ సమాఖ్య (ఎఐఎఫ్‌ఎఫ్) నిర్ణయించింది. 2018 వరల్డ్ కప్ క్వాలిఫయర్స్‌లో భారత జట్టు పేలవమైన ఆటతో నిరాశ పరుస్తున్నప్పటికీ, అతనిపైనే సమాఖ్య నమ్మకం ఉంచడం విశేషం.

కోల్‌కతా, నవంబర్ 25: లెజెండరీ టెన్నిస్ స్టార్ మార్టినా నవ్రతిలోవా, లియాండర్ పేస్ జోడీపై సానియా మీర్జా, మహేష్ భూపతి జోడీ 7-5, 7-5 తేడాతో విజయం సాధించింది. ఇంటర్నేషనల్ ప్రీమియర్ టెన్నిస్ లీగ్ (ఐపిటిఎల్)ను ప్రమోట్ చేసేందుకు ఇక్కడ జరిగిన ఈ ఎగ్జిబిషన్ మ్యాచ్ ప్రేక్షకులను ఆకట్టుకుంది. పశ్చిమ బెంగాల్ ముఖ్యమంత్రి మమతా బెనర్జీ మ్యాచ్ ఆరంభించేందుకు వచ్చి, కొద్దిసేపు సరదాగా టెన్నిస్ ఆడింది.

కొచ్చి, నవంబర్ 25: బాలురు, బాలికలకు వేరువేరు కేంద్రాల్లో విడివిడిగా పోటీలను నిర్వహించాలని భారత పాఠశాల క్రీడల సమాఖ్య (ఎస్‌జిఎఫ్‌ఐ) తీసుకున్న నిర్ణయంపై మాజీ అథ్లెట్ పిటి ఉష ఆగ్రహం వ్యక్తం చేసింది. ఈ వివక్ష ఎందుకని అధికారులను నిలదీసింది. వెంటనే ఈ విషయంలో జోక్యం చేసుకోవాల్సిందిగా కోరుతూ ప్రధాని నరేంద్ర మోదీకి లేఖ రాసింది.

న్యూఢిల్లీ, నవంబర్ 24: భారత్‌తో స్వదేశంలోగానీ, యునైటెడ్ అరబ్ ఎమిరేట్స్ (యుఎఇ)లోగానీ ద్వైపాక్షిక సిరీస్ జరిగే అవకాశం లేకపోయినప్పటికీ, తటస్థ వేదికగా శ్రీలంకను భారత క్రికెట్ నియంత్రణ బోర్డు (బిసిసిఐ) ఎంపిక చేసే అవకాశం ఉందన్న వార్త పాకిస్తాన్ క్రికెట్ బోర్డు (పిసిబి)కి ఊరటనిస్తోంది. సహజంగా వేదిక మారినప్పుడు ప్రసార హక్కులకు సంబంధించిన సమస్యలు తలెత్తుతాయి.