కాకినాడ: గోకవరం మండలం కొత్తపల్లి వద్ద బుధవారం ఉదయం ఇసుక ట్రాక్టర్ ఢీకొనడంతో బైక్ వెనుక కూర్చున్న వెంకటేశ్ అనే 12 ఏళ్ల విద్యార్థి అక్కడికక్కడే మరణించాడు. క్రిస్మస్ సెలవులకు ఇంటికి వెళ్లి తిరిగి గోకవరంలోని హాస్టల్‌కు వస్తుండగా ఇసుక ట్రాక్టర్ ఢీకొంది.

శ్రీకాకుళం: ఎల్.ఎన్.పేట మండలం గొట్టిపల్లి వద్ద మంగళవారం అర్ధరాత్రి ఏనుగులు పంట పొలాలపై విరుచుకుపడి కుప్పలుగా పోసిన ధాన్యాన్ని చెల్లాచెదరు చేశాయి. ఏనుగుల తాకిడితో గ్రామస్థులు ఒక్కసారి ఆందోళనకు లోనయ్యారు. ఈ ఘటనపై అటవీ శాఖ అధికారులకు సమాచారం అందజేశారు.

కాకినాడ: సహచర విద్యార్థులు సూటి పోటి మాటలతో వేధించడంతో మనస్తాపం చెందిన శంకర్ రెడ్డి అనే 9వ తరగతి విద్యార్థి పురుగు మందు తాగి ఆత్మహత్య చేసుకున్నారు. తూ.గో.జిల్లా మారేడువిల్లి గురుకుల పాఠశాలలో మంగళవారం ఉదయం విద్యార్థి మృతదేహాన్ని కనుగొన్నారు. మృతదేహం వద్ద లభించిన సూసైడ్ నోట్‌ను పోలీసులు స్వాధీనం చేసుకున్నారు.

విశాఖ: చలి తీవ్రత పెరిగి ఉదయం 10 గంటల వరకు మంచు మేఘాలు కమ్ముకోవడంతో విశాఖ మన్యం కొత్త అందాలను సంతరించుకుంది. ఈ ప్రకృతి దృశ్యాలను వీక్షించేందుకు పర్యాటకులు అధిక సంఖ్యలో వస్తున్నారు. లంబసింగి, బొర్రాగుహలు, కొత్తపల్లి వాటర్ ఫాల్స్ తదితర ప్రాంతాలను సందర్శించేందుకు చలిని సైతం లెక్కచేయకుండా పర్యాటకులు వస్తున్నారు. మంగళవారం ఉదయం లంబసింగిలో 7 డిగ్రీల కనిష్ఠ ఉష్ణోగ్రత నమోదైంది.