కాకినాడ: సీతానగరం మండలం జానిమూడి వద్ద గురువారం ఉదయం వేగంగా వస్తున్న లారీ ఓ బైక్‌ను ఢీకొనడంతో వివాహిత మహిళ మరణించింది. ఈ ఘటనలో తీవ్రంగా గాయపడిన ఆమె భర్తను ఆస్పత్రిలో చేర్పించారు. మద్యం మత్తులో లారీని నడిపిన డ్రైవర్‌ను పట్టుకుని స్థానికులు దేహశుద్ధి చేశారు. భర్త పరిస్థితి విషమంగా ఉందని పోలీసులు తెలిపారు.

విశాఖ: పాడేరు ఎఎస్పీ శశికుమార్ మృతి ఘటనపై సమగ్ర దర్యాప్తు జరుగుతుందని జిల్లా ఎస్పీ రాహుల్ శర్మ మీడియాకు తెలిపారు. రివాల్వర్ పొరపాటున పేలిందా? లేక శశికుమార్ ఆత్మహత్య చేసుకున్నారా? అన్న విషయాలను క్షుణ్ణంగా పరిశీలించేందుకు ఓ అధికారి నియమించినట్టు ఎస్పీ చెప్పారు. పోస్టుమార్టం నివేదిక వచ్చాక ఏ విషయం నిర్ధారణ అవుతుందన్నారు.

గుంటూరు: ఈ ఏడాది జనవరిలో హైదరాబాద్‌లోని సెంట్రల్ యూనివర్సిటీలో ఆత్మహత్య చేసుకున్న రోహిత్ వేముల దళిత కులస్థుడేనని గుంటూరు జిల్లా కలెక్టర్ కాంతిలాల్ దండే జాతీయ ఎస్సీ, ఎస్టీ కమిషన్‌కు నివేదిక సమర్పించారు. రోహిత్ ఆత్మహత్య అనంతరం ఆయన కులంపై వివాదం చెలరేగిన సంగతి తెలిసిందే. రోహిత్ తండ్రి వడ్డెర కులానికి చెందినందున అతను దళితుడు కాదన్న వాదనలు వినిపించాయి.

ఏలూరు, జూన్ 15 : పశ్చిమగోదావరి జిల్లాలో టిడిపి, బిజెపి కూటమి అగ్గి రగులుతోంది. ఈ కూటమి జిల్లా మొత్తాన్ని కైవశం చేసుకున్నా మిత్రుల మధ్యే బేధాభిప్రాయాలు పెరిగి మంత్రి మాణిక్యాలరావు రాజీనామాకు సిద్ధపడే పరిస్థితులకు దారి తీస్తోంది. తాడేపల్లిగూడెం కేంద్రంగా ఈ పరిణామాలు చోటు చేసుకోవడం గమనార్హం.