నెల్లూరు: జిల్లాలోని వింజమూరు ప్రాంతంలో మంగళవారం మధ్యాహ్నం భూ ప్రకంపనలు చోటు చేసుకున్నాయి. కొన్ని సెకన్లపాటు భూమి కంపించడంతో జనం భయంతో ఇళ్లనుంచి బయటకు పరుగులు తీశారు. గత కొద్దిరోజుల్లో నెల్లూరు, ప్రకాశం జిల్లాల్లో తరచూ భూ ప్రకంపనలు చోటు చేసుకుంటున్నాయి.

విజయవాడ: టిడిపికి చెందిన కాపు ప్రజాప్రతినిధులు, ముఖ్యనేతలతో ఎపి సిఎం చంద్రబాబు మంగళవారం ఇక్కడ సమావేశమయ్యారు. రాజమండ్రి ఆస్పత్రిలో కాపుఉద్యమ నాయకుడు ముద్రగడ పద్మనాభం ఆమరణ దీక్ష కొనసాగిస్తున్న నేపథ్యంలో తాజా పరిస్థితుల గురించి ఆయన ఆరా తీశారు. డిప్యూటీ సిఎం నిమ్మకాయల చినరాజప్ప, మంత్రి నారాయణ, పార్టీ నాయకులు జ్యోతుల నెహ్రూ, పయ్యావుల కేశవ్, తోట నర్సింహం తదితరులతో బాబు చర్చలు జరిపారు.

హైదరాబాద్: ఎపి సచివాలయం తరలింపు ప్రక్రియ ఆగస్టు 15 నాటికి పూర్తవుతుందని సెక్రటేరియట్ ఉద్యోగుల సంఘం అధ్యక్షుడు మురళీకృష్ణ తెలిపారు. ఇప్పటికే కొన్ని శాఖలు ఎపి రాజధానికి తరలివెళ్లాయన్నారు. ఉద్యోగుల తరలింపు విషయమై ప్రభుత్వంతో తమకు ఎలాంటి విభేదాలు లేవన్నారు. ప్రభుత్వం కచ్చితమైన మార్గదర్శకాలను జారీ చేసినందున ఎపి ఉద్యోగులంతా హైదరాబాద్‌ను వీడి వెళ్లేందుకు సిద్ధంగా ఉన్నట్టు తెలిపారు.

కాకినాడ: తుని విధ్వంసకాండకు సంబంధించి అరెస్టు చేసిన వారిని విడుదల చేయాలని కోరుతూ కాపు ఉద్యమనేత ముద్రగడ పద్మనాభం చేస్తున్న ఆమరణ దీక్ష మంగళవారం ఆరోరోజుకు చేరింది. రాజమండ్రి ఆస్పత్రిలో పోలీసులు చేర్పించినప్పటికీ ఆయన దీక్ష కొనసాగిస్తూ వైద్యాన్ని నిరాకరిస్తున్నారు. ఆయన ఆరోగ్యం క్షీణించిందని రాజమండ్రి ప్రభుత్వ ఆస్పత్రి వైద్యులు తెలిపారు.