రాజమండ్రి: రాజమండ్రి ప్రభుత్వ ఆస్పత్రిలో ఆమరణ దీక్ష కొనసాగిస్తున్న కాపు ఉద్యమనేత ముద్రగడ పద్మనాభం వైద్య పరీక్షలకు సహకరించడం లేదని డాక్టర్లు సోమవారం తెలిపారు. ఆస్పత్రిలో ఉన్న ముద్రగడ భార్య, కొడుకు, కోడలికి మాత్రం వైద్యపరీక్షలు చేశామని డాక్టర్లు చెప్పారు. వైద్యాన్ని నిరాకరిస్తే ముద్రగడ ఆరోగ్యం మరింత క్షీణించే ప్రమాదం ఉందని వారు తెలిపారు.

ఏలూరు: ఓ యువకుడి మృతితో మొగల్తూరు మండలం పాతపాడులో సోమవారం ఉదయం ఉద్రిక్త పరిస్థితి ఏర్పడింది. ఉద్దేశ పూర్వకంగా ఆ యువకుడిని కొందరు హత్యచేసి, రోడ్డు ప్రమాదంలో మరణించినట్టు చిత్రీకరిస్తున్నారని మృతుడి బంధువులు ఆందోళన చేపట్టారు. ఉద్రిక్తతను చల్లార్చేందుకు పోలీసులు గ్రామానికి చేరుకున్నారు.

ఒంగోలు: ఓ వివాహిత మహిళ అనుమానాస్పద స్థితిలో మరణించిన ఘటన దర్శి మండలం బండివెలిగండ్లలో సోమవారం ఉదయం వెలుగు చూసింది. స్వప్న అనే మహిళ ఆదివారం అర్ధరాత్రి దాటాక ఆత్మహత్య చేసుకుందని స్థానికులు చెబుతున్నారు. అయితే, తాళికట్టిన భర్తే స్వప్నను చంపేసి ఆత్మహత్యగా చిత్రీకరిస్తున్నట్లు మృతురాలి బంధువులు ఆరోపిస్తున్నారు. స్వప్న బంధువుల ఫిర్యాదుపై పోలీసులు కేసు నమోదు చేశారు.

విజయనగరం: అత్తను అల్లుడే కిరాతకంగా హత్య చేసిన ఘటన విజయనగరం జిల్లా మెంటాడ మండలం పోరాంలో సోమవారం ఉదయం వెలుగు చూసింది. అత్తతో గొడవపడిన అల్లుడు ఉన్మాదంతో ఆమెను అంతం చేశాడని స్థానికులు చెబుతున్నారు. పోలీసులు సంఘటనా స్థలానికి చేరుకుని మృతదేహాన్ని పోస్టుమార్టంకు తరలించారు.