విజయవాడ: ఇక్కడి గన్నవరం ఎయిర్‌పోర్టులో అదనపు టెర్మినల్ పనులను ఎపి సిఎం చంద్రబాబు సోమవారం సాయంత్రం పరిశీలించారు. నిర్మాణం పనులను సకాలంలో పూర్తి చేసేందుకు చర్యలు తీసుకోవాలని ఆయన అధికారులను ఆదేశించారు.

కాకినాడ: వైకాపా అధినేత జగన్ ఈనెల 15, 16 తేదీల్లో ఉభయ గోదావరి జిల్లాల్లో జరుపతలపెట్టిన పర్యటన వాయిదా పడింది. ఈ మేరకు వైకాపా జిల్లా నేతలకు సమాచారం అందింది. కాపుఉద్యమనేత ముద్రగడ పద్మనాభం ప్రస్తుతం రాజమండ్రి ఆస్పత్రిలో ఆమరణ దీక్ష కొనసాగిస్తున్నందున శాంతి భద్రతల పరిస్థితిపై పోలీసులు నిఘా పెట్టారు. ఎప్పుడు ఏం జరుగుతుందో చెప్పలేని పరిస్థితి ఏర్పడిందని పోలీసులు అనుక్షణం అప్రమత్తంగా వ్యవహరిస్తున్నారు.

విజయవాడ: ప్రభుత్వం నుంచి ఎలాంటి అనుమతులు లేకుండా అధిక మొత్తంలో ఫీజులు వసూలు చేస్తున్న ప్రైవేటు, కార్పొరేట్ స్కూళ్లను వెంటనే మూసివేయాలని డిమాండ్ చేస్తూ పిడిఎస్‌యు ఆధ్వర్యంలో సోమవారం ఇక్కడ విద్యార్థులు ఆందోళనకు దిగారు. అనుమతి లేకుండా నడుస్తున్న చైతన్య టెక్నో స్కూల్ ఎదుట వారు ఆందోళన ప్రారంభించారు.

తిరుపతి: తిరుమల కొండలపై కొద్దిరోజులుగా చిరుత పులుల సంచారం అధికమైంది. దీంతో నడకదారిన కొండపైకి చేరుకునే భక్తులు ఆందోళనకు గురవుతున్నారు. కొద్దిరోజుల క్రితం ప్రహరీ గోడ దూకి ఓ మఠంలోకి చిరుత ప్రవేశించినట్టు సిసి కెమెరాలో రికార్డయింది. అలాగే, రింగ్‌రోడ్డుపై రెండు చిరుతలు తిరుగుతున్నట్టు ఓ భక్తుడు సెల్‌ఫోన్‌లో చిత్రీకరించాడు. చిరుతల నుంచి ప్రమాదం పొంచి ఉందని భక్తులు భయాందోళనలకు లోనవుతున్నారు.