వరంగల్, డిసెంబర్ 23: జనవరిలో అసెంబ్లీ సమావేశాలు నిర్వహిస్తామని తెలంగాణ స్పీకర్ మధుసూదనాచారి అన్నారు. బుధవారం చిట్యాల మండల కేంద్రంలో అభివృద్ధి పనులపై సమీక్ష నిర్వహించిన అనంతరం మీడియాతో మాట్లాడారు. పార్టీ ఫిరాయింపుదారులపై సమావేశాల్లో నిర్ణయం తీసుకుంటామన్నారు. పార్టీలు మారిన ఎమ్మెల్యేల అనర్హత వేటుపై రాజ్యాంగ నిపుణుల అభిప్రాయం తీసుకుంటున్నామని, త్వరలోనే నిర్ణయం వెల్లడిస్తానన్నారు.

హైదరాబాద్/ సంగారెడ్డి, డిసెంబర్ 23: శృంగేరి పీఠం తర్వాత దేశంలోనే మొట్టమొదటిసారిగా ముఖ్యమంత్రి కె చంద్రశేఖర్‌రావుప్రతిష్ఠాత్మకంగా తలపెట్టిన మహత్కార్యం అయుత మహా చండీయాగం రుత్విక్కులు నిర్ణయించిన శుభ ముహుర్తంలో బుధవారం ఉదయం 8.30 గంటలకు అత్యంత భక్తిశ్రద్ధలతో, వైభవోపేతంగా ప్రారంభమైంది.

కరీంనగర్: సుల్తానాబాద్ మండలం పూతల గ్రామం దరి శాస్ర్తీనగర్ వద్ద బుధవారం ఉదయం ఓ సైకో వీరంగం చేసి నానా బీభత్సం సృష్టించాడు. దుకాణాలపైన, రోడ్డుపై వెళ్లే వాహనాలపైన రాళ్లతో ఇతను దాడి చేయడంతో స్థానికులు బెంబేలెత్తిపోయారు. చివరికి కొందరు ధైర్యం చేసి సైకోను పట్టుకుని చెట్టుకు కట్టేసి పోలీసులకు సమాచారం అందించారు. పోలీసులు వచ్చి సైకోను తీసుకుపోవడంతో జనం ఒక్కసారి ఊపిరి పీల్చుకున్నారు.

హైదరాబాద్: చైన్ స్నాచర్ల భరతం పడతామని పోలీసులు హెచ్చరిస్తున్న నేపథ్యంలో నగరంలో రాజేంద్రనగర్ లక్ష్మీనగర్ కాలనీ వద్ద బుధవారం ఉదయం మరో చైన్ స్నాచింగ్ సంఘటన జరిగింది. తన ఇంటి ముందు పూలు తెంచుకొని వెళ్తుండగా బైక్‌పై వచ్చిన ఇద్దరు ఆగంతకులు ఆ మహిళ మెడలో నుంచి ఆరు తులాల బంగారు గొలుసును తెంచుకొని పరారయ్యారు. కింద పడిపోయిన మహిళ స్వల్పంగా గాయపడింది.