న్యూఢిల్లీ, మార్చి 17: జనాభా లెక్కల సేకరణలో భాగంగా దేశంలోని వెనుకబడిన కులాల జనాభా లెక్కలను కూడా సేకరించాలని కాంగ్రెస్ పార్టీ సీనియర్ నాయకుడు వీ.హనుమంత రావు ప్రధాని నరేంద్ర మోదీని కోరారు. దేశంలోని కోట్లాది మంది వెనుకబడిన కులాల వారి ప్రయోజనాలను నిజంగానే పరిరక్షించాలనుకుంటే మొదట వారి జనాభా లెక్కలను సేకరించాలని వీహెచ్ మంగళవారం విలేకరుల సమావేశంలో తెలిపారు.

జమ్మూకాశ్మీర్: కాశ్మీర్‌లో పార్కులు, ఉద్యానవన ప్రదేశాలను మూసివేశారు. ఇక్కడ ఇప్పటి వరకు మూడ కరోనా కేసులు నమోదు కావటంతో అధికార యంత్రాంగం అప్రమత్తమైంది. ఇప్పటివరకు అన్ని విద్యాసంస్థలను మూసివేయగా తాజాగా కరోనా కట్టడికి ఈ నిర్ణయం తీసుకున్నారు.

న్యూఢిల్లీ: తాజ్ సందర్శనను నిలిపివేశారు. దేశంలో కరోనా వైరస్ విజృంభిస్తుండటంతో పర్యాటక ప్రదేశాలను మూసివేస్తున్నారు. కరోనా విజృంభిస్తున్న నేపథ్యంలో మార్చి 31వ తేదీ వరకు దేశంలో పాఠశాలలు, విశ్వవిద్యాలయాలు, వ్యాయామశాలలు, పురాతన కట్టడాల సందర్శన, ప్రదర్శనశాలలు, మ్యూజియంలను మూసివేస్తున్నట్లు కేంద్ర పర్యాటక శాఖ వెల్లడించింది. ఈ మేరకు పర్యాటక శాఖ మంత్రి ప్రహ్లాద్ పటేల్ తెలిపారు.

న్యూఢిల్లీ: సుప్రీం కోర్టు మాజీ ప్రధాన న్యాయమూర్తి జస్టిస్ రంజన్ గొగోయ్ రాజ్యసభకు నామినేట్ అయ్యారు. నామినేటెడ్ సభ్యుల పదవీకాలం ముగియటంతో వారిని నియమించాల్సి ఉంది. ఈ నేపథ్యంలో రాష్టప్రతి రామ్‌నాథ్ కోవింద్ జస్టిస్ రంజన్ గొగోయ్‌ను నామినేట్ చేస్తూ ఉత్తర్వులు జారీ చేశారు. 2018లో సీజేఐగా బాధ్యతలు స్వీకరించిన ఆయన తన పదవీకాలంలో ఎన్నో కీలక తీర్పులు వెలువరించారు.