న్యూఢిల్లీ, ఏప్రిల్ 15: రెండు నెలలుగా పెట్రోలు, డీజిల్ ధరలను పెంచుతూ వచ్చిన ఇండియన్ ఆయిల్ కార్పొరేషన్ వినియోగదారులకు శుక్రవారం స్వల్ప ఊరటనందించింది. పెట్రోలుపై లీటరుకు 74 పైసలు, డీజిల్‌పై రూ.1.30పైసల చొప్పున తగ్గించింది. మారిన ఈ రేట్ల ప్రకారం ఢిల్లీలో లీటరు పెట్రోలు ధర రూ.61.13 పైసలకు తగ్గింది. అలాగే డీజిల్ రేటు కూడా రూ.49.31పైసల నుంచి 48.01 పైసలకు తగ్గింది.

ముంబయి: ‘బాలికా వధు’ ఫేమ్ టీవీ నటి ప్రత్యూష ఆత్మహత్యకు కారకుడైన ప్రియుడు రాహుల్‌రాజ్ సింగ్‌పై చట్టపరంగా కఠిన చర్యలు తీసుకోవాలని ఆమె తల్లి సోమా బెనర్జీ మహారాష్ట్ర సిఎం ఫడ్నవిస్‌కు లేఖ రాశారు. రాహుల్ వేధింపులకు, వంచనకు తాళలేక తన కుమార్తె మరణించిందని ఆమె ఆరోపించారు. ఎంతోమంది యువతులను మోసగించిన రాహుల్ ఇపుడు ప్రత్యూష ఆత్మహత్య కేసులో సాక్షులను బెదిరిస్తున్నట్లు సోమా పేర్కొన్నారు.

గౌహతి: గ్రామపెద్దల నిర్ణయాన్ని కాదని ఎన్నికల్లో వేరే పార్టీకి ఓటు వేసినందుకు ఆగ్రహించి భార్యకు విడాకులిచ్చేశాడు ఓ భర్త. అస్సాం అసెంబ్లీకి తాజాగా జరిగిన ఎన్నికల్లో సోనిట్‌పూర్ జిల్లా డోనం అడ్డహతి గ్రామంలో ఈ సంఘటన జరిగింది. అసెంబ్లీ ఎన్నికల్లో కాంగ్రెస్ అభ్యర్థికి ఓట్లు వేయాలని గ్రామపెద్దలు తీర్మానించారు. అయితే, గ్రామపెద్దల తీర్మానానికి విరుద్ధంగా బిల్వారా బేగం బిజెపికి ఓటు వేసింది.

దిల్లీ: దేశం నుంచి పారిపోయి లండన్‌లో కొంతకాలంగా ఉంటున్న ప్రముఖ పారిశ్రామిక వేత్త, రాజ్యసభ ఎంపీ విజయ్ మాల్యా పాస్‌పోర్టును ఇక్కడి ప్రాంతీయ పాస్‌పోర్టు కార్యాలయం అధికారులు రద్దు చేశారు. బ్యాంకులకు భారీ మొత్తంలో రుణాలు చెల్లించనందున తమ వద్ద హాజరు కావాలని ఎన్‌ఫోర్స్‌మెంటు విభాగం (ఈడీ) ఇదివరకే పలుసార్లు కోరింది.