విశాఖ: అచ్యుతాపురం వద్ద బ్రాండిక్స్ సెజ్ వద్ద మహిళా కార్మికులు సోమవారం ఉదయం బైఠాయించడంతో పరిస్థితి ఉద్రిక్తంగా మారింది. జీతాలు పెంచాలని, పిఎఫ్‌ను సక్రమంగా జమ చేయాలని తదితర డిమాండ్లను తీర్చకుంటే తాము విధులకు హాజరయ్యే ప్రసక్తే లేదని కార్మికులు తెగేసి చెబుతున్నారు. ఈ సందర్భంగా యాజమాన్య ప్రతినిధులతో అనకాపల్లి ఎంపీ శ్రీనివాసరావు, ఎమ్మెల్యే రమేష్‌బాబు జరిపిన చర్చలు విఫలమయ్యాయి.

విజయవాడ: ఎపిలో గతనెలలో జరిగిన ఇంటర్ ప్రథమ, ద్వితీయ సంవత్సరం పరీక్షా ఫలితాలను మంగళవారం ఇక్కడ రాష్ట్ర విద్యాశాఖ మంత్రి గంటా శ్రీనివాసరావు విడుదల చేస్తారు. ఈ నెల 20న ప్రథమ, రెండు రోజుల తర్వాత ద్వితీయ సంవత్సరం ఫలితాలను విడుదల చేయాలని ముందుగా భావించినప్పటికీ, మూల్యాంకన ప్రక్రియ పూర్తికావడంతో 19నే ఫలితాలు విడుదల చేసేందుకు ఇంటర్ బోర్డు అన్ని ఏర్పాట్లు చేసింది.

రాజమండ్రి: ఓ మహిళను కిడ్నాప్ చేసి, ఆపై సామూహిక అత్యాచారానికి పాల్పడిన నలుగురు నిందితులను పోలీసులు గుర్తించారు. ఇప్పటికే ఓ నిందితుడిని అదుపులోకి తీసుకుని మిగతా ముగ్గురి కోసం పోలీసు బృందాలు గాలిస్తున్నాయి. వీరిపై నిర్భయ చట్టం కింద కేసు నమోదు చేశారు. నిందితులంతా రౌడీషీటర్లేనని, వీరిపై గతంలో పలు కేసులున్నాయని పోలీసులు చెబుతున్నారు.

శ్రీకాకుళం: రాజాం మండలం గురవాం గ్రామంలో సోమవారం ఉదయం ఓ ఇంట్లో వంటగ్యాస్ (ఎల్‌పిజి) సిలిండర్ పేలి ఇద్దరు మరణించారు. ఈ ఘటనలో గాయపడిన ముగ్గురిని రాజాం ఆస్పత్రికి తరలించారు. గ్యాస్ లీక్ అయినందునే ప్రమాదం జరిగి ఉంటుందని పోలీసులు అంటున్నారు.