ఒంగోలు: పరస్పర సహకారంతో సమస్యలను పరిష్కరించుకోవాలని తాను గతంలోనే చెప్పానని, ఇదే విషయమై తెలంగాణ సిఎం కెసిఆర్ తాజాగా చేసిన సూచనను తాను స్వాగతిస్తున్నానని ఎపి సిఎం చంద్రబాబు అన్నారు. సాగునీటి సమస్యలను చర్చల ద్వారా పరిష్కరించుకోవచ్చని ఆయన తెలిపారు. నీటి పంపకంతో పాటు అనేక విషయాల్లో ఇచ్చిపుచ్చుకునే ధోరణిని పొరుగు రాష్ట్రాలు అనుసరించాల్సి ఉందన్నారు.

తిరుపతి: తిరుపతి బస్టాండ్ నిర్వహణ తీరు అధ్వాన్నంగా ఉందని ఆర్టీసీ ఎండి సాంబశివరావు తీవ్ర అసంతృప్తి వ్యక్తం చేశారు. ఆయన ఇక్కడి బస్ కాంపెక్సును శనివారం పరిశీలించి, విధి నిర్వహణలో అధికారులు నిర్లక్ష్యంగా వ్యవహరిస్తున్నారని ఆగ్రహం వ్యక్తం చేశారు. విజయవాడ, విశాఖ బస్‌కాంప్లెక్సుల మాదిరి తిరుపతి బస్టాండ్‌ను తీర్చిదిద్దాలన్నారు.

అనంతపురం: అనంతపురం జిల్లాకు దక్కాల్సిన హంద్రీనీవా ప్రాజెక్టు జలాలను చిత్తూరు జిల్లా కుప్పంకు తరలించేందుకు ముఖ్యమంత్రి ప్రయత్నిస్తున్నారని అఖిలపక్ష నేతలు ఆందోళన వ్యక్తం చేశారు. ఇక్కడ శనివారం జరిగిన అఖిలపక్ష సమావేశంలో వైకాపా, కాంగ్రెస్, ఉభయ కమ్యూనిస్టు పార్టీలు, మానవహక్కుల సంస్థ ప్రతినిధులు మాట్లాడుతూ హంద్రీనీవా జలాలపై చిత్తూరు జిల్లాకు ఎలాంటి హక్కూ లేదన్నారు.

విశాఖ: తమపై దేవాదాయశాఖ అధికారులు తప్పుడు కేసులు పెడుతున్నందుకు నిరసనగా ఈ నెల 27 తర్వాత రాష్ట్ర వ్యాప్తంగా ఆలయాలను మూసివేస్తామని అర్చకుల సంఘం నేతలు హెచ్చరించారు. అనేక ఆలయాల్లో అర్చకులకు నిత్యం వేధింపులు, తప్పుడు కేసులు తప్పడం లేదని వారు ఆందోళన వ్యక్తం చేస్తున్నారు.