విశాఖ: విధుల నుంచి తమను తొలగించినందుకు నిరసనగా విశాఖలో ముగ్గురు టాక్సీ డ్రైవర్లు సోమవారం ఒంటిపై కిరోసిన్ పోసుకుని ఆత్మహత్యకు యత్నించారు. ఉబెర్ క్యాబ్స్ సంస్థలో పనిచేస్తున్న తమను తొలగించి కొత్తవారిని తీసుకోవడం అన్యాయమని వీరు అంటున్నారు. ముగ్గురు డ్రైవర్లు ఆత్మహత్యకు యత్నించడంతో స్థానిక రాంనగర్‌లో కలకలం మొదలైంది.

కర్నూలు: శ్రీశైలంలోని భ్రమరాంబ మల్లికార్జున స్వామి ఆలయం ఇంజనీరింగ్ విభాగంపై అవినీతి ఆరోపణలు రావడంతో విజిలెన్స్ ఎన్‌ఫోర్స్‌మెంటు అధికారులు సోమవారం తనిఖీలు ప్రారంభించారు. పలు అభివృద్ధి పనులకు సంబంధించిన రికార్డులను వారు పరిశీలిస్తున్నారు.

విశాఖ: మామిడికాయలను రాత్రికిరాత్రి మగ్గబెట్టేందుకు కార్బయిడ్ వాడితే చట్టప్రకారం చర్యలు తప్పవని ఆహార భద్రత అధికారులు హెచ్చరించారు. విశాఖలోని పూర్ణామార్కెట్, జ్ఞానాపురం, ఎంవిపి కాలనీ తదితర ప్రాంతాల్లోని పండ్లమార్కెట్లను అధికారులు సోమవారం ఉదయం తనిఖీ చేసి మామిడిపండ్లను సేకరించారు. కృత్రిమంగా మగ్గపెట్టిన పండ్ల విషయంలో ప్రజలు కూడా అప్రమత్తంగా ఉండాలని అధికారులు సూచించారు.

విశాఖ: విశాఖలో రైల్వేజోన్ ఏర్పాటు చేయాలని నాలుగు రోజులుగా ఆమరణ దీక్ష చేస్తున్న వైకాపా నాయకుడు గుడివాడ అమర్‌నాథ్ సోమవారం తమ పార్టీ అధినేత జగన్ సమక్షంలో ఆందోళన విరమించారు. ఆదివారం రాత్రి దీక్షను భగ్నం చేసి అమర్‌నాథ్‌ను కెజిహెచ్‌లో పోలీసులు చేర్పించారు. ఈరోజు మధ్యాహ్నం జగన్ ఆస్పత్రికి వచ్చి అమర్‌నాథ్‌కు నిమ్మరసం ఇచ్చి దీక్షను విరమింపజేశారు.