భీమవరం, ఏప్రిల్ 19: ఆటలాడుతూ, నిలిపివుంచిన కారు ఎక్కిన చిన్నారులు ఊపిరిఆడక మృత్యువాతపడిన విషాద ఘటన పశ్చిమ గోదావరి జిల్లా భీమవరంలో మంగళవారం చోటుచేసుకుంది. అక్కాచెల్లెళ్లు ఈ ఘటనలో మృతిచెందగా, తీవ్ర అస్వస్థతకు గురైన మరో సోదరిని ఏలూరు ప్రభుత్వాసుపత్రికి తరలించారు.

హైదరాబాద్: ఎపిలో కరవు పరిస్థితులు నెలకొన్నా ఎలాంటి సహాయక చర్యలు తీసుకోనందుకు నిరసనగా వచ్చే నెల 2న అన్ని మండల కేంద్రాల్లో ధర్నాలు జరపాలని, ఖాళీ బిందెలతో ఆందోళనలు నిర్వహించాలని వైకాపా నిర్ణయించింది. పార్టీ జిల్లా అధ్యక్షులు, ముఖ్య నాయకులతో వైకాపా అధినేత వైఎస్ జగన్ మంగళవారం నిర్వహించిన సమావేశంలో ఈ మేరకు నిర్ణయం తీసుకున్నారు.

రాజమండ్రి: పోలవరం నీటిపారుదల ప్రాజెక్టు వల్ల నిర్వాసితులైన గిరిజనులకు న్యాయం జరిగేలా ఉద్యమం చేపడతామని సిపిఎం నేత రాఘవులు తెలిపారు. తెలంగాణ నుంచి ఎపిలోకి విలీనమైన మండలాల్లో ఆయన మంగళవారం పర్యటించారు. ప్రజల సమస్యలను ప్రభుత్వాలు పట్టించుకోనందున గిరిజనులతో కలిసి తాము పోరుబాట పడతామన్నారు.

విశాఖ: ప్రస్తుత వేసవిలో చలివేంద్రాల ఏర్పాటు, నిర్వహణ తీరుతెన్నులను పర్యవేక్షించేందుకు జిల్లా, రాష్ట్ర స్థాయి కమిటీలను నియమిస్తామని ఎపి టిడిపి అధ్యక్షుడు కె.కళావెంకట్రావు తెలిపారు. ఆయన మంగళవారం ఇక్కడ మీడియాతో మాట్లాడుతూ, ఈ కమిటీలు సంక్షేమ పథకాలనూ పరిశీలిస్తాయన్నారు. గ్రేటర్ విశాఖ మున్సిపల్ ఎన్నికలు ఎపుడు జరిగినా తమ పార్టీ మెజారిటీ స్థానాలను కైవసం చేసుకుంటుందన్నారు.