ఏలూరు: పశ్చిమ గోదావరి జిల్లా టి.నర్సాపురం మండలం కృష్ణాపురం అటవీ ప్రాంతంలో బుధవారం మధ్యాహ్నం ఆకస్మికంగా మంటలు చెలరేగాయి. సుమారు 50 ఎకరాల మేరకు అడవి కాలిపోయిందని, ఫైర్ సిబ్బంది ఇంకా మంటలను అదుపుచేస్తున్నట్లు అధికారులు తెలిపారు. అగ్నిప్రమాదానికి కచ్చితమైన కారణాలేవీ ఇంకా తెలియరాలేదు.

విజయవాడ: అశాస్ర్తియంగా రాష్ట్ర విభజన జరిగినందున కాంగ్రెస్ పార్టీ భారీ మూల్యం చెల్లించుకుందని ఎపి సిఎం చంద్రబాబు అన్నారు. అందరితో చర్చించి రాష్ట్రాన్ని విభజించి ఉంటే నేడు ఎపికి ఇన్ని కష్టాలు ఉండేవి కావని తాను ఇదివరకే పలుసార్లు చెప్పానని ఆయన గుర్తు చేశారు. ఇక్కడ బుధవారం జరిగిన టిడిపి సమావేశంలో ఆయన మాట్లాడుతూ, రాజధాని లేకుండా రాష్ట్రాన్ని విభజించి కాంగ్రెస్ పాలకులు పెద్ద తప్పు చేశారన్నారు.

విజయవాడ: విభజన చట్టంలో ఎపికి ఇచ్చిన హామీలన్నింటినీ కేంద్రం అమలు చేయాలని సిఎం చంద్రబాబు అన్నారు. మిగతా రాష్ట్రాల్లా అభివృద్ధి చెందేవరకూ ఎపికి అన్ని విధాలా ఆర్థిక సాయం అందించాలని ఆయన బుధవారం ఇక్కడ జరిగిన టిడిపి సమావేశంలో అన్నారు. ఎన్ని ఇబ్బందులున్నా సంక్షేమ పథకాల అమలులో ఎలాంటి రాజీ లేదన్నారు.

విశాఖ: నగరంలో బిఎస్సీ రెండో సంవత్సరం కెమిస్ట్రీ ప్రశ్నపత్రం బుధవారం లీక్ అయ్యింది. కొందరు వ్యక్తులు డబ్బులు వసూలు చేసి ఈ పేపర్‌ను విద్యార్థులకు వాట్సప్ ద్వారా పంపించారు. మధ్యాహ్నం రెండు గంటలకు పరీక్ష జరగాల్సి ఉండగా కొన్ని గంటల ముందే పేపర్ లీక్ అయింది. ఈ విషయం తెలిశాక ఆంధ్ర విశ్వవిద్యాలయం అధికారులు ప్రత్యామ్నాయ ఏర్పాట్లు చేశారు.