కడప, ఏప్రిల్ 21: రాజకీయ స్వలాభం కోసం అడ్డదిడ్డంగా రాష్ట్ర విభజన చేసి ఆంధ్రప్రదేశ్ ప్రజలను అధోగతి పాలు చేశారని ముఖ్యమంత్రి చంద్రబాబునాయుడు అన్నారు. అప్పట్లో ప్రతిపక్షంలో ఉన్న బిజెపి నేడు అధికారంలోకి వచ్చినందున విభజన చట్టం మేరకు ఆంధ్రప్రదేశ్‌కు న్యాయం చేయాలని డిమాండ్ చేశారు. కడపలో గురువారం ఉదయం జరిగిన విలేఖరుల సమావేశంలో ఆయన మాట్లాడుతూ విభజన చట్టాన్ని అమలు చేసే బాధ్యత కేంద్రానిదేనన్నారు.

ఒంగోలు, ఏప్రిల్ 21: రాష్ట్రంలో సకాలంలో వర్షాలు కురిసి ఈ సంవత్సరం తెలుగు ప్రజలందరితోపాటు రైతులు సుఖ సంతోషాలతో ఉంటారని విశాఖ శారదా పీఠాధిపతి శ్రీ స్వరాపానందేంద్ర స్వామి వెల్లడించారు. గురువారం ప్రకాశం జిల్లా చీమకుర్తిలోని హరిహరక్షేత్రం పదవ వార్షికోత్సవం సందర్భంగా స్వామి ముఖ్యఅతిథిగా పాల్గొని భక్తులనుద్దేశించి అభిభాషణ చేశారు.

చిత్తూరు: బట్టలు ఉతికేందుకు వెళ్లిన భార్య బావిలో పడగా ఆమెను రక్షించేందుకు వెళ్లిన భర్త కూడా నీట మునిగి మరణించిన సంఘటన పుంగనూరు మండలం వేపమాకులపల్లెలో గురువారం జరిగింది. బట్టలు ఉతికేందుకు వెళ్లిన మణెమ్మ ప్రమాదవశాత్తూ బావిలో పడిపోయింది. ఆమెను కాపాడేందుకు వెళ్లిన భర్త గంగులప్ప కూడా కాలుజారి బావిలో పడ్డాడు. దంపతుల మృతితో గ్రామంలో విషాదం అలముకుంది.

కడప: పులివెందులలో రెండు రోజుల క్రితం ఎస్‌బిఐ ఎటిఎంల్లో నగదు పెట్టడానికి వెళుతున్న సిబ్బందిపై ఇనుపరాడ్లతో దాడి చేసి 53 లక్షల రూపాయలను దోచుకున్న ఘటనలో ఇద్దరు అంతర్రాష్ట్ర దొంగలతో పాటు నలుగురు స్థానిక దొంగలను పోలీసులు గురువారం అరెస్టు చేశారు. వీరి నుంచి 53 లక్షల రూపాయల నగదును స్వాధీనం చేసుకున్నారు.