మచిలీపట్నం, ఏప్రిల్ 23: జూన్ 16 నాటికి రాష్ట్రంలోని అన్ని పురపాలక సంఘాల్లో నూరు శాతం ఎల్‌ఇడి లైట్లు ఏర్పాటు చేయనున్నట్లు రాష్ట్ర పురపాలక శాఖ మంత్రి పి నారాయణ తెలిపారు. మచిలీపట్నం పురపాలక సంఘానికి శనివారం వచ్చిన ఆయన విలేఖర్లతో మాట్లాడుతూ.. రాష్ట్రంలోని 110 పురపాలక సంఘాల్లో 5లక్షల 50వేల ఎల్‌ఇడి లైట్ల ఏర్పాటుకు ప్రభుత్వం చర్యలు చేపట్టిందని చెప్పారు.

కర్నూలు సిటీ, ఏప్రిల్ 23: ఎస్సీ వర్గీకరణపై ఎన్నికల ముందు ఇచ్చిన హామీని విస్మరించారంటూ ఎమ్మార్పీఎస్ కార్యకర్తలు శనివారం కర్నూలు నగరంలోని టిడిపి కార్యాలయంపై దాడి చేసి విధ్వంసం సృష్టించారు. అధికారంలోకి రాగానే వర్గీకరణ బిల్లును అసెంబ్లీలో ఏకగ్రీవంగా తీర్మానం చేసి, పార్లమెంట్ ఆమోదం కోసం డిల్లీకి పంపుతామని హామీ ఇచ్చా మోసం చేశారని ఈ సందర్భంగా ఎమ్మార్పీఎస్ నేతలు ధ్వజమెత్తారు.

విశాఖపట్నం: కొబ్బరితోట పార్కు స్థలంలో వెలసిన రైతుబజార్‌లోని దుకాణాలను తొలగించడానికి జీవీఎంసీ అధికారులు ప్రయత్నించగా వ్యాపారులు అడ్డుకున్నారు. ప్రత్యామ్నాయం చూపిస్తే వెళతామని, లేదంటే ఆత్మహత్యలు చేసుకుంటామని వ్యాపారులు అధికారులను హెచ్చరించారు. పరిస్థితి ఉద్రిక్తంగా మారింది. భారీ ఎత్తున పోలీసులు మొహరించారు.

ఒంగోలు: అద్దంకి ఎమ్మెల్యే గొట్టిపాటి రవికుమార్ వైకాపాకు రాజీనామా చేస్తారన్న ఊహాగానాలు ఒక్కసారి ఊపందుకున్నాయి. ఆయన త్వరలోనే టిడిపిలో చేరే అవకాశాలున్నాయని సమాచారం. సంతమాగలూరులో ఆయన మూడు మండలాలకు చెందిన పార్టీ కార్యకర్తలు, ముఖ్యనేతలతో శనివారం సమావేశమై సుదీర్ఘంగా మంతనాలు జరపడం ప్రాధాన్యత సంతరించుకుంది.