విజయవాడ, ఏప్రిల్ 25: రాష్ట్ర రాజధాని అమరావతి నగరంపై దేశ విదేశీ సంస్థలు, పెట్టుబడిదారుల కళ్లన్నీ ఉండటంతో ఇక ఈప్రాంత భూములు రైతుల ఇంటి సిరులు పండించనున్నాయని ముఖ్యమంత్రి నారా చంద్రబాబు నాయుడు అన్నారు. అయితే సంఘ వ్యతిరేక శక్తుల వలలో పడి ఏ చిన్న ఆందోళన చేపట్టినా పెట్టుబడిదారులంతా వెనుదిరిగితే తీవ్రంగా నష్టపోయి కృష్ణానదిలో దూకాల్సిన పరిస్థితులు ఎదురవుతాయంటూ కూడా ఆయన తీవ్రంగా హెచ్చరించారు.

వరదయ్యపాళెం/తడ, ఏప్రిల్ 25: రాష్ట్ర విభజన తరువాత ఇబ్బందులు ఎదుర్కొంటున్నామని, ఇవి తాత్కాలికమేనని ముఖ్యమంత్రి చంద్రబాబునాయుడు వెల్లడించారు. శాశ్వతంగా సమస్యలు పరిష్కారం కావాలంటే వ్యవసాయం బాగా అభివృద్ధి చెందాల్సిన అవసరం ఉందన్నారు. సోమవారం శ్రీసిటీలో తొలి దశలో వెయ్యి కోట్ల రూపాయల పెట్టుబడితో 134 ఎకరాల్లో ఏర్పాటుచేసిన క్యాడ్బరీ చాక్లెట్ ఫ్యాక్టరీని సోమవారం సిఎం ప్రారంభించారు.

ఏలూరు: దెందులూరు మండలం గోపన్నపాలెం వద్ద సోమవారం ఉదయం వేగంగా వస్తున్న ట్రాక్టర్ ఓ బైక్‌ను ఢీకొనండతో ఇద్దరు పిల్లలు సహా ఓ వ్యక్తి మరణించాడు. గాయపడిన మహిళను ఆస్పత్రికి తరలించారు. ట్రాక్టర్ అదుపుతప్పడం వల్లే ఈ ప్రమాదం జరిగిందని సమాచారం.

గుంటూరు: ఉద్యోగులు సహకరించడం వల్లే పదిశాతం వృద్ధి రేటును ఎపి సాధించిందని సిఎం చంద్రబాబు అన్నారు. తాత్కాలిక సచివాలయం ప్రారంభం సందర్భంగా వెలగపూడిలో ఆయన మాట్లాడుతూ, మంచి పరిపాలన అందించేందుకు ఉద్యోగులు సహకరించాలని కోరారు. అమరావతికి వచ్చే ఉద్యోగులకు వారంలో అయిదురోజులే పనిదినాలు ఉంటాయని, అదనపు హెచ్‌ఆర్‌ఎ చెల్లిస్తామన్నారు. జూన్ 15 నాటికి ఉద్యోగులంతా కొత్త రాజధానికి చేరుకోవాలన్నారు.