విశాఖ: ఓ గుమస్తాకు, అర్చకుల మధ్య వివాదం ఫలితంగా శ్రీరామనవమి పర్వదినాన విశాఖ నగరంలో ఓ రామాలయం మూతపడింది. తనపై అర్చకులు దాడి చేశారంటూ ఇక్కడి చెంగల్రావుపేటలోని రామాయలంలో పనిచేస్తున్న గుమస్తా నాగేశ్వరరావు వన్‌టౌన్ పోలీస్ స్టేషన్‌లో ఫిర్యాదు చేయగా, తమపై తప్పుడు కేసు పెట్టారంటూ అర్చకులు ఆందోళనకు దిగారు. ఆలయానికి తాళాలు వేసి అర్చకులు నిరసనకు దిగడంతో భక్తులు వెనుదిరిగారు.

కర్నూలు: ప్రేమించిన యువతితో పెళ్లి చేసేందుకు పెద్దలు నిరాకరించడంతో తిరుపతికి చెందిన సాయి అనే సాఫ్ట్‌వేర్ ఇంజనీర్ నంద్యాలలోని ఓ లాడ్జిలో శుక్రవారం ఆత్మహత్యకు యత్నించాడు. ఈ విషయమై ప్రియురాలు పోలీసులకు సమాచారం ఇవ్వడంతో వెంటనే అతడిని ఆస్పత్రిలో చేర్చారు. సాయికి ప్రాణాపాయం తప్పిందని పోలీసులు తెలిపారు.

చిత్తూరు: వేగంగా వస్తున్న ఓ లారీ కారును ఢీకొనడంతో ఇద్దరు మరణించిన ఘటన శుక్రవారం ఉదయం బంగారుపాళ్యం మండలం గుండ్లకట్టమంచి వద్ద జరిగింది. మృతులను కర్నాటక వాసులుగా గుర్తించారు. ఈ ఘటనలో గాయపడిన నలుగురిని ఆస్పత్రికి తరలించారు.

కడప: ప్రైవేటు విద్యాసంస్థల పోటీని తట్టుకునేందుకు ప్రభుత్వ పాఠశాలల్లో ఇంగ్లీష్ మీడియంను ప్రవేశపెడతామని ఎపి మానవవనరుల మంత్రి గంటా శ్రీనివాసరావు తెలిపారు. ఆయన రాజంపేటలో శుక్రవారం మీడియాతో మాట్లాడుతూ, పిల్లల తల్లిదండ్రులు ప్రైవేటు స్కూళ్లనే ఆశ్రయిస్తున్నందున సర్కారీ బడుల్లో విద్యార్థుల సంఖ్య తగ్గుతోందన్నారు.