చెన్నై: రాజకీయ ప్రయోజనాల కోసం అబ్దుల్‌ కలాం చిత్రపటాలను గాని, పేరును గాని ఉపయోగించరాదని మద్రాస్‌ హైకోర్టు ఆదేశాలు జారీ చేసింది. కలాం సహాయకుడు పొనరాజ్‌ ‘అబ్దుల్‌ కలాం లక్ష్య ఇండియా’ పేరుతో రాజకీయ పార్టీని ప్రారంభించి అసెంబ్లీ ఎన్నికలకు సిద్ధమయ్యారు. ఈ నేపథ్యంలో కలాం సోదరుడు మహమ్మద్‌ ముత్తుమీరాన్ హైకోర్టులో ఓ పిటీషన్ దాఖలు చేశారు.

దిల్లీ: నరేంద్ర మోదీ నేతృత్వంలో ఎన్‌డిఎ సర్కారు అధికారంలోకి వచ్చి రెండేళ్లు గడిచినా అగస్టా హెలికాప్టర్ల కుంభకోణంపై ఎందుకు దర్యాప్తు చేపట్టలేదని దిల్లీ సిఎం కేజ్రీవాల్ ప్రశ్నించారు. ఈ కుంభకోణంలో దోషులను శిక్షించాలంటూ శనివారం ఇక్కడి జంతర్ మంతర్ వద్ద ఆమ్ ఆద్మీ పార్టీ నిర్వహించిన ధర్నాలో కేజ్రీవాల్ ప్రసంగించారు.

దిల్లీ: యుపిలో నీటికొరతను నివారించేందుకు ప్రధాని నరేంద్ర మోదీ శనివారం ఏర్పాటు చేసిన ఉన్నతస్థాయి సమావేశానికి యుపి సిఎం అఖిలేష్ యాదవ్ హాజరు కావడం చర్చనీయాంశమైంది. తాగునీటి సమస్యతో అల్లాడుతున్న యుపికి ఇటీవల కేంద్రం నీటిరైలును పంపగా యుపి సర్కారు తిప్పిపంపిన సంగతి తెలిసిందే. ఈ నేపథ్యంలో ప్రధాని ఏర్పాటు చేసిన సమావేశానికి అఖిలేష్ హాజరు కావడం రాజకీయంగా ప్రాధాన్యతను సంతరించుకుంది.

శ్రీనగర్: జమ్ము-కాశ్మీర్‌లోని పుల్వామాలో సైనికులు, ఉగ్రవాదుల మధ్య శనివారం ఉదయం కాల్పులు జరిగాయి. ఆ ప్రాంతంలో సైనికులు ఆకస్మిక తనిఖీలు చేస్తుండగా ఓ ఇంట్లో దాక్కున్న ఉగ్రవాదులు కాల్పులు జరిపారు. దీంతో అప్రమత్తమైన సైనికులు కాల్పులు జరపగా ముగ్గురు ఉగ్రవాదులు మరణించారు. పరారైన ఉగ్రవాదుల కోసం సైనికులు గాలింపు చర్యలు చేపట్టారు.