పాట్నా: అమాయకుడైన ఓ యువకుడిని జెడియు ఎమ్మెల్యే కుమారుడు కాల్చి చంపినందుకు నిరసనగా బిజెపి ఆధ్వర్యంలో గయలో సోమవారం బంద్ జరుగుతోంది. జెడియు శాసనసభ్యురాలు మనోరమాదేవి కుమారుడైన రాఖీకుమార్ యాదవ్ తన కారును ఓవర్‌టేక్ చేశాడని గయలో ఓ యువకుడిని తుపాకీతో కాల్చి చంపిన సంగతి తెలిసిందే. ఆదివారం జరిగిన ఈ ఘటన బీహార్‌లో సంచలనం సృష్టించింది. బంద్ సందర్భంగా గయలో దుకాణాలను బిజెపి కార్యకర్తలు మూసివేయించారు.

దిల్లీ: అసెంబ్లీలో జరిగే బలపరీక్షకు తమను అనర్హులుగా ప్రకటిస్తూ హైకోర్టు ఇచ్చిన ఆదేశాలపై 9 మంది బహిష్కృత కాంగ్రెస్ ఎమ్మెల్యేలు ఈరోజు సుప్రీం కోర్టులో పిటిషన్ వేశారు. హైకోర్టు ఆదేశాలను రద్దు చేసి, తాము బలపరీక్షకు హాజరయ్యేందుకు అనుమతించాలని కోరుతూ వీరు దాఖలు చేసిన పిటిషన్‌పై ఈరోజు మధ్యాహ్నం 2 గంటల తర్వాత సుప్రీం కోర్టు విచారిస్తుంది.

దిల్లీ: అగస్టా కుంభకోణంపై ప్రధాని నరేంద్ర మోదీ సభకు వచ్చి వివరణ ఇవ్వాలంటూ కాంగ్రెస్ సభ్యులు పట్టుబట్టడంతో సోమవారం రాజ్యసభలో ఘర్షణ వాతావరణం ఏర్పడింది. కాంగ్రెస్ ఎంపీలు తమ డిమాండ్‌ను వినిపిస్తూ పదేపదే నినాదాలు చేశారు. సభకు రావాల్సిందిగా ప్రధానమంత్రిని తాను ఆదేశించలేనని రాజ్యసభ డిప్యూటీ చైర్మన్ స్పష్టం చేశారు.

నైనిటాల్: తొమ్మిది మంది కాంగ్రెస్ బహిష్కృత ఎమ్మెల్యేలు ఈ నెల 10న అసెంబ్లీలో జరిగే బలపరీక్షకు అనర్హులని ఉత్తరాఖండ్ హైకోర్టు సోమవారం స్పష్టం చేసింది. దీంతో కాంగ్రెస్ పార్టీకి ఊరట లభించింది. రాష్టప్రతి పాలన విధించడంతో పదవీచ్యుతుడైన ముఖ్యమంత్రి హరీష్ రావత్ ఈనెల 10న అసెంబ్లీలో బలపరీక్షకు సిద్ధం కావాలని సుప్రీం కోర్టు ఆదేశించిన సంగతి తెలిసిందే.