నైనిటాల్: పదవీచ్యుతుడైన ముఖ్యమంత్రి హరీష్ రావత్ ఉత్తరాఖండ్ శాసనసభలో బలపరీక్షను ఎదుర్కొంటున్నారు. సుప్రీం కోర్టు ఆదేశాల మేరకు ఈరోజు ఉదయం 11 గంటలకు బలపరీక్ష మొదలైంది. ఈ ప్రక్రియ మధ్యాహ్నం ఒంటి గంటకు ముగుస్తుంది. రెండు గంటల సేపు రాష్టప్రతి పాలనను సడలించి బలపరీక్షను అధికారులు నిర్వహిస్తున్నారు. చివరి నిమిషంలోనూ రాజకీయ వేదికపై అనూహ్య పరిణామాలు చోటుచేసుకుంటన్నాయి.

దిల్లీ: మెడికల్ కోర్సుల్లో అడ్మిషన్లకు దేశవ్యాప్తంగా నిర్వహించే అర్హత పరీక్ష (నీట్)లో ప్రాంతీయ భాషలకు అవకాశం కల్పించాలని కేంద్రం సుప్రీం కోర్టును కోరింది. కొన్ని రాష్ట్రాల్లో ఇప్పటికే మెడికల్ ఎంట్రన్స్‌లు జరిగాయని, ఆంగ్ల మాధ్యమానికి, నెగిటివ్ మార్కుల విధానానికి కొన్ని రాష్ట్రాల విద్యార్థులు ఇంకా అలవాటుపడలేదని ఈ కారణంగా వీరికి ఒక అవకాశం ఇవ్వాలని అభ్యర్థించింది.

గయ/పాట్నా, మే 9: ఓ వ్యక్తిని నిర్దాక్షిణ్యంగా కాల్చిచంపిన బీహార్ ఎమ్‌ఎల్‌సి కుమారుడు పరారీలోనే ఉన్నాడు. రెండో రోజైన సోమవారం కూడా అతడి జాడ తెలియలేదు. మరోపక్క ఈ ఘటనలో దోషుల్ని వదిలేది లేదని, చట్టం నుంచి ఎవరూ తప్పించుకోలేరని బీహార్ ముఖ్యమంత్రి నితీశ్ కుమార్ ఉద్ఘాటించారు. శనివారం నాటి ఈ ఘటనకు నిరసనగా గయలో బంద్ నిర్వహించారు. ముఖ్యమంత్రి నితీశ్‌పై ఎన్డీయే భాగస్వామ్య పక్షాలు విరుచుకు పడుతున్నాయి.

న్యూఢిల్లీ, మే 9: ఉత్తరాఖండ్‌లో అనర్హత వేటుకు గురైన 9 మంది కాంగ్రెస్ తిరుగుబాటు ఎమ్మెల్యేలకు సుప్రీం కోర్టులో చుక్కెదురైంది. రాష్ట్ర శాసనసభలో తమను అనర్హులుగా ప్రకటించడాన్ని సవాలుచేస్తూ వీరు దాఖలు చేసుకున్న పిటిషన్‌ను సుప్రీం కోర్టు సోమవారం డిస్మిస్ చేసి ఆ రాష్ట్ర ముఖ్యమంత్రి హరీష్ రావత్‌కు పెద్ద ఊరట కల్పించింది.