ముంబయి: నగరంలోని బాంబేహౌస్‌లో ప్రఖ్యాత టాటా సంస్థ ప్రధాన కార్యాలయంలో శనివారం ఉదయం మంటలు చెలరేగాయి. దీంతో కార్యాలయంలోని ఉద్యోగులు భయకంపితులై ఒక్కసారి బయటకు పరుగుతీశారు. సమాచారం అందిన వెంటనే అగ్నిమాపక సిబ్బంది బాంబేహౌస్‌కు చేరుకుని మంటలను అదుపుచేశారు. అగ్నిప్రమాదానికి దారితీసిన కారణాలపై అధికారులు ఆరా తీస్తున్నారు.

న్యూఢిల్లీ/కోల్‌కతా, జూన్ 10: అంతర్జాతీయ స్వచ్ఛంద సంస్థలో పనిచేస్తున్న భారతీయ మహిళను కాబూల్‌లో అనుమానిత ఉగ్రవాదులు కిడ్నాప్ చేశారు. కోల్‌కతాకు చెందిన జుదిత్ డిసౌజా కాబూల్‌లో ఆగాఖాన్ ఫౌండేషన్ సంస్థలో సీనియర్ సాంకేతిక సలహాదారుగా పనిచేస్తున్నారు. గురువారం సాయంత్రం ఆఫీసు బయట జుదిత్‌తో పాటు సెక్యూరిటీ గార్డు, డ్రైవర్‌ను కిడ్నాప్ చేశారు. కాబూల్ నడిబొడ్డున తైమని ప్రాంతంలో ఈ ఘటన చోటుచేసుకుంది.

లక్నో, జూన్ 10: భారత్ ప్రపంచంలోనే అత్యంత వేగంగా అభివృద్ధి చెందుతున్న దేశమని కేంద్ర హోంమంత్రి రాజ్‌నాథ్ సింగ్ పేర్కొన్నారు. గత ఆర్థిక సంవత్సరంలో చైనా, అమెరికాకన్నా కూడా భారత్ ఎక్కువ పెట్టుబడులు సుమారు 51 బిలియన్ డాలర్లను ఆకర్షించిందని ఆయన అన్నారు. మన దేశం ‘ఎకనమిక్ సూపర్‌పవర్’గా అవతరించే రోజు మరెంతో దూరంలో లేదని ఆయన అన్నారు.

న్యూఢిల్లీ, జూన్ 10: న్యూఢిల్లీలోని ఆంధ్రా భవన్‌లో ఉద్యోగుల పనిదినాలను వారానికి ఐదు రోజులు చేస్తూ రాష్ట్ర ప్రభుత్వం ఉత్తర్వులు జారీ చేసింది. ఈ నెల 13వ తేదీ నుంచి అమల్లోకి వచ్చే ఈ ఉత్తర్వుల ప్రకారం ఏపీ భవన్ ఉద్యోగులు ఉదయం 9 గంటల నుంచి సాయంత్రం 5.30 గంటల వరకు విధులు నిర్వర్తించాల్సి ఉంటుంది. ప్రస్తుతం ఉద్యోగులు ఉదయం 10 గంటల నుంచి సాయంత్రం 5 గంటల వరకు విధులు నిర్వర్తిస్తున్నారు.