కరీంనగర్: భారీగా వడ్డీ చెల్లిస్తానని పలువురి వద్ద అప్పులు చేసిన ఓ మహిళ బిచాణా ఎత్తేసిన సంఘటన గోదావరి ఖనిలో సోమవారం వెలుగు చూసింది. గోదావరి ఖనిలోని ఎల్‌బి నగర్‌లో ఉంటున్న శోభారాణి అధిక వడ్డీ ఇస్తానని చెప్పి పలువురి నుంచి 1.22 లక్షలు అప్పుగా తీసుకుంది. ఆదివారం రాత్రి నుంచి ఆమె కనిపించకుండా పోయిందని బాధితులు పోలీసులకు ఫిర్యాదు చేశారు. ఆమె ఆచూకీ కోసం పోలీసులు గాలింపు చేస్తున్నారు.

హైదరాబాద్: హెచ్‌సియు వైస్ చాన్సలర్ అప్పారావును పదవి నుంచి తొలగించాలని కోరుతూ కాంగ్రెస్ ఎంపి వి.హనుమంతరావు వేసిన పిటిషన్‌పై హైకోర్టు సోమవారం విచారణ ప్రారంభించింది. ఈ సందర్భంగా విచారణ సమయంలో జడ్జితో మాట్లాడేందుకు విహెచ్ యత్నించగా ధర్మాసనం ఆగ్రహణ వ్యక్తం చేసింది. బయటి వ్యక్తులు హెచ్‌సియు వ్యవహారాల్లో జోక్యం చేసుకోవడం ఏమిటని కోర్టు ప్రశ్నించింది. కేసు విచారణను జూన్ 28కి వాయిదా వేసింది.

వరంగల్: గాలివాన బీభత్సం సృష్టించడంతో ఓ ఇంటిపైకప్పు కూలి గణేష్ అనే 13 ఏళ్ల బాలుడు మరణించాడు. స్టేషన్ ఘనపూర్ మండలం మల్కాపురంలో ఆదివారం రాత్రి ఈ దుర్ఘటన జరిగింది.

హైదరాబాద్, ఏప్రిల్ 17: మధ్యాహ్నం రెండు గంటల వరకూ అదరగొట్టిన ఎండ...ఆ తర్వాత ఎటు పోయిందో ఏమో? అకస్మాత్తుగా వాతావరణం చల్లబడింది. చూస్తుండగానే సన్నటి చినుకులు మొదలై, భారీ వర్షంగా మారింది. అనుకోని ఈ హఠాత్పరిణామానికి రవ్వంత విస్తుపోయినా వర్షం తెచ్చిన ఆనందంతో నగరజీవి కేరింతలు కొట్టాడు. ఏదేమైతేనేం... నేల చల్లబడింది. రెండునెలలుగా మండుటెండల్లో మలమలమాడుతున్న నగరవాసుల మనసు కాస్తయినా కుదుటపడింది.