హైదరాబాద్, ఏప్రిల్ 16: రాష్ట్రంలో కరవు పరిస్థితులను అంచనా వేసేందుకు తెలుగు దేశం పార్టీ ఈ నెల 18 నుంచి 25వ తేదీ వరకు పర్యటించాలని నిర్ణయించింది. జిల్లాల్లో 18 నుంచి 25వ తేదీ వరకు 10 బృందాలు క్షేత్ర స్థాయిలో పర్యటించనున్నట్లు టిడిపి సీనియర్ నాయకుడు, మాజీ ఎంపి రావుల చంద్రశేఖర్ రెడ్డి శనివారం విలేఖరుల సమావేశంలో తెలిపారు. ఒక్కో బృందంలో ముగ్గురు సభ్యులు ఉంటారని ఆయన తెలిపారు.

హైదరాబాద్, ఏప్రిల్ 16: తెలంగాణ మ్యూచువల్లీ ఎయిడెడ్ కో ఆపరేటివ్ హౌసింగ్ సొసైటీలో జరిగిన అక్రమాలపై సిబిఐ చేత విచారణ జరిపించాలని కోరుతూ ఆ సొసైటీ ఉపాధ్యక్షుడు జె రవీందరెడ్డి, మరో ఇద్దరు హైకోర్టులో పిటిషన్ దాఖలు చేశారు. ఈ సొసైటీలో దాదాపు రూ. 419 కోట్ల మేర దుర్వినియోగం జరిగిందని వారు పిటిషన్‌లో ఆరోపించారు.

హైదరాబాద్:అత్యధిక ఉష్ణోగ్రతలతో అట్టుడుకుతున్న భాగ్యనగరంలో ఆదివారం మధ్యాహ్నం పలుచోట్ల కురిసన వానతో నగరవాసులకు కాస్తంత ఉపశమనం లభించింది. కొన్ని రోజులుగా 43 డిగ్రీల సెల్సియస్ ఉష్ణోగ్రతతో అల్లల్లాడుతున్న ప్రజలకు ఈ వర్షంతో కాస్త తెరిపి దొరికింది. బోడుప్పల్, ఇసిఐఎల్, అంబర్‌పేట్ తదితర ప్రాంతాల్లో ఉన్నట్లుండి మబ్బులు కమ్మి చల్లనిగాలులు వీచి వర్షం కురియడంతో నగరం చల్లబడింది.

ఆదిలాబాద్, ఏప్రిల్ 16: ఆదిలాబాద్ జిల్లాలో నిప్పుల కుంపటి రాజేస్తోంది. పదేళ్ల రికార్డును తిరగరాసి ఏప్రిల్ మాసంలో అసాధారణ రీతిలో ఉష్ణోగ్రతలు నమోదవుతుండడం జిల్లా ప్రజలను ఉక్కిరిబిక్కిరి చేస్తోంది.