హైదరాబాద్: నగరంలో సాఫ్ట్‌వేర్ ఇంజనీర్ హష్మీ హత్యకు సంబంధించి నిందితుడు నరేష్‌ను పోలీసులు బుధవారం అరెస్టు చేశారు. హష్మీ ఇంటిపక్కన ఉంటున్న నరేష్ పథకం ప్రకారం డబ్బు కోసం హత్యకు పాల్పడ్డాడని పోలీసులు తెలిపారు. హష్మీని నిర్జన ప్రదేశానికి తీసుకువెళ్లి బండరాయితో తలపై గట్టిగా మోది, 600 రూపాయల నగదు, బంగారు గొలుసును తీసుకుని నరేష్ ఉడాయించాడు.

హైదరాబాద్: వివిధ రంగాలకు సంబంధించి ప్రభుత్వ సలహాదారులుగా పనిచేస్తున్న విద్యాసాగర్‌రావు, గోయల్, రమణాచారి, పాపారావు, జిఆర్ రెడ్డి, రామ్‌లక్ష్మణ్ సేవలను తెలంగాణ సర్కారు మరో ఏడాది పాటు పొడిగించింది. ఈ మేరకు బుధవారం ఉత్తర్వులు జారీ చేశారు.

హైదరాబాద్: మెడికల్ కోర్సుల్లో అడ్మిషన్లకు జూలై 9న ఎంసెట్-2 నిర్వహించాలని తెలంగాణ ప్రభుత్వం నిర్ణయించింది. ఈ మేరకు బుధవారం షెడ్యూల్‌ను ప్రకటించారు. మే 28న నోటిఫికేషన్ విడుదల చేస్తారు. జూన్ 1 నుంచి 7 వరకూ ఆన్‌లైన్‌లో దరఖాస్తులను స్వీకరిస్తారు. జూలై 9న ఉదయం 10 నుంచి మధ్యాహ్నం ఒంటిగంట వరకూ ఎంట్రన్స్ నిర్వహిస్తారు. అదే రోజు ప్రాథమిక ‘కీ’ విడుదల చేసి, 14న ర్యాంకులను ప్రకటిస్తారు.

నిజమాబాద్: పదో తరగతిలో మంచి మార్కులతో ప్యాసయిన పిల్లలను హైదరాబాద్‌లోని కళాశాలలో చేర్పిద్దామని తీసుకువెళ్తుండగా మృత్యువు కాటేసింది. ఈ ఘటనలో ముగ్గురు పిల్లలు, దంపతులు ప్రాణాలు కోల్పోయారు. నిజామాబాద్ జిల్లా కామారెడ్డి వద్ద బుధవారం ఉదయం ఈ ఘోరం జరిగింది. ఆలూరుకు చెందిన హర్ష, వెల్మల్‌కు చెందిన నిఖిత, భరత్‌లతో పాటు వారి తల్లిదండ్రులు కారులో హైదరాబాద్‌కు వెళ్తుండగా ఎదురుగా వచ్చిన లారీ ఢీకొంది.