పొన్నూరు, అక్టోబర్ 27: పొన్నూరు మున్సిపల్ పారిశుద్ధ్య కార్మికుడు, రైలుపేట నివాసి యర్రంశెట్టి గంగాధరరావు (45) మృతదేహం పట్టణంలోని తుంగభద్ర డ్రైన్‌లో తేలియాడుతూ శనివారం కన్పించింది. మృతదేహాన్ని పొన్నూరు పట్టణ పోలీసులు స్వాధీనం చేసుకుని పోస్టుమార్టంకు తరలించారు. ఆత్మహత్యా, హత్య అనే విషయం తెలియకపోవడంతో అనుమానాస్పద మృతిగా కేసు నమోదు చేసి పట్టణ ఎస్‌ఐ కిషోర్‌బాబు కేసు దర్యాప్తు చేస్తున్నారు.

రామచంద్రపురం, అక్టోబర్ 27: రామచంద్రపురం జడ్పీటీసీ జోగా వీరభద్రరావు ఇంట్లో శుక్రవారం రాత్రి భారీచోరీ జరిగింది. ఇంట్లో ఎవరూ లేని సమయంలో ఇంటి తాళాలు పగులగొట్టి చోరీ చేశారు. ఇంటికి కాపలాగా ఉండే కుక్కను కూడ మత్తు ఇచ్చి ఇంటిని దోచుకున్నారు. ద్రాక్షారామ పోలీసు స్టేషన్ పరిధిలోని వెలంపాలెం గ్రామంలో వీరభద్రరావు నివసిస్తున్నారు.

భద్రాచలం టౌన్, అక్టోబర్ 27: చత్తీస్‌గఢ్‌లో ఈసారి మావోయిస్టులు రెచ్చిపోయారు. శనివారం మావోయిస్టులు జరిపిన దాడిలో ఐదుగురు సీఆర్‌పీఎఫ్ జవాన్లు మృతి చెందగా, మరొకరు తీవ్రంగా గాయపడ్డారు. భద్రతా బలగాల విస్తృత కూంబింగ్‌లు, వరస ఎన్‌కౌంటర్లతో ఇటీవల కాలంలో భారీగా నష్టం చవిచూసిన మావోయిస్టులు సార్వత్రిక ఎన్నికల నేపథ్యంలో అదును చూసి సీఆర్‌పీఎఫ్ బలగాలపై దాడి చేశారు.

గోరంట్ల, అక్టోబర్ 27 : మండల పరిధిలోని శిరిగంవాండ్లపల్లిలో వివాహిత ఆత్మహత్యకు పాల్పడినట్లు సీఐ ధరణికిషోర్ తెలిపారు. గ్రామానికి చెందిన కవితమ్మను నాలుగేళ్ల క్రితం ఓడీసీ మండలం చౌడంపల్లికి చెందిన ఆంజనేయులుకు ఇచ్చి వివాహం చేశారు. ఆమెకు రెండేళ్ల కుమారుడు ఉన్నాడు. దసరా పండుగకు పుట్టింటికి వచ్చిన కవిత శనివారం ఇంట్లో ఎవరూ లేని సమయంలో పైకప్పునకు చీరతో ఉరేసుకుని ఆత్మహత్యకు పాల్పడింది.