తిరుపతి: సమాజ్‌వాదీ పార్టీ అధినేత అమర్‌సింగ్ సోమవారం ఉదయం తిరుమలలో శ్రీవేంకటేశ్వర స్వామివారిని దర్శించుకున్నారు. ఆలయ అధికారులు ఆయనకు స్వాగతం పలికి తీర్థప్రసాదాలను అందజేశారు.

హైదరాబాద్: వైకాపా ఎమ్మెల్యే రోజాను ఏడాదిపాటు అసెంబ్లీ సమావేశాల నుంచి సస్పెండ్ చేస్తూ ఇటీవల స్పీకర్ తీసుకున్న నిర్ణయంపై గోపాలకృష్ణ కళానిధి అనే న్యాయవాది సోమవారం హైకోర్టులో ప్రజా ప్రయోజన వాజ్యం (పిల్) దాఖలు చేశారు. దీనిపై విచారణను మంగళవారానికి వాయిదా వేసినట్లు కోర్టు ప్రకటించింది.

రాజమహేంద్రవరం: గోదావరి పుష్కరాలు ప్రారంభోత్సవం రోజు గత ఏడాది జూలై 14న రాజమహేంద్రవరంలోని పుష్కరఘాట్ వద్ద జరిగిన తొక్కిసలాటపై సోమవారం విచారణ జరగనుంది. ఈ సంఘటనకు దారితీసిన కారణాలు, ఏర్పాట్లలో ఏమైనా లోపాలు ఉన్నాయా? బాధ్యులెవరు తదితర అంశాలపై విచారణ నిర్వహించడానికి రాష్ట్రప్రభుత్వం జస్టిస్ సోమయాజులు కమిషన్‌ను నియమించిన సంగతి విదితమే.

అనంతపురం: రాయలసీమలో భానుడు తన ప్రతాపం చూపిస్తున్నాడు. గడచిన వారం రోజులుగా మండుతున్న ఎండలతో జనం విలవిలలాడుతూ ఉండగా రెండు మూడు రోజుల నుంచీ పగటి ఉష్ణోగ్రతలు అమాంతం పెరిగిపోతున్నాయి. అనంతపురం జిల్లాలో ఆదివారం అత్యధికంగా 42.7 డిగ్రీల ఉష్ణోగ్రత నమోదయింది. దీంతోప్రజలు బయటకు రావాలంటేనే భయపడే పరిస్థితి ఏర్పడింది.