ఏలూరు: కేంద్ర ప్రభుత్వ సహకారంతో పోలవరం సాగునీటి ప్రాజెక్టును సకాలంలో పూర్తిచేస్తామని ఎపి సిఎం చంద్రబాబు సోమవారం పశ్చిమ గోదావరి జిల్లా చిట్టవరంలో ఏరువాక కార్యక్రమం ప్రారంభం సందర్భంగా అన్నారు. రెండోపంటకు నీరిచ్చిన ఘనత తమకే దక్కిందన్నారు. గత పాలకులు రైతులను అన్ని విధాలా నిర్లక్ష్యం చేయగా, తాము రుణమాఫీతో ఆదుకున్నామన్నారు.

విజయనగరం: గ్రానైట్ కోసం కొండలను తవ్వి పర్యావరణానికి, తమ ఉపాధికి చేటు చేయవద్దని సిపిఎం నేతృత్వంలో సోమవారం పార్వతీపురంలోని ఐటిడిఎ వద్ద గిరిజన సంఘాలు ఆందోళన నిర్వహించాయి. పార్వతీపురం మండలం బోడికొండపై గ్రానైట్ తవ్వకాలకు అధికారులు అనుమతులిస్తే తాము ఉద్యమిస్తామని వారు హెచ్చరించారు. గ్రానైట్ తవ్వకాలపై తమ మనోభావాలను ఇకనైనా ప్రభుత్వం గుర్తించాలని ఆందోళనకారులు డిమాండ్ చేశారు.

విజయవాడ: నవ్యాంధ్ర రాజధాని నిర్మాణానికి పంటపొలాలు ఇచ్చిన రైతులకు స్థలాలు కేటాయించే కార్యక్రమం వాయిదా పడింది. అమరావతి ప్రాంతంలో సోమవారం లాటరీ పద్ధతిలో రైతులకు స్థలాలు కేటాయిస్తామని సిఆర్‌డిఎ అధికారులు ప్రకటించారు. అయితే, ప్రస్తుతం విస్తారంగా వర్షాలు కురుస్తున్నందున ఈ కార్యక్రమాన్ని నిరవధికంగా వాయిదా వేసినట్లు మున్సిపల్ మంత్రి నారాయణ తెలిపారు.

విశాఖ: కేంద్ర రైల్వేశాఖా మంత్రి సురేష్ ప్రభు మంగళవారం విశాఖలో జరుపతలపెట్టిన పర్యటన చివరి నిమిషంలో వాయిదా పడింది. నవ్యాంధ్ర రాజధాని అమరావతికి ప్రత్యేక ఇంటర్ సిటీ రైలును ప్రారంభించేందుకు విజయవాడ వచ్చిన ఆయన విశాఖలోనూ పర్యటిస్తారని తొలుత అధికారులు ప్రకటించారు. ఇక్కడికి వస్తే రైల్వేజోన్ గురించి ప్రకటన చేయాల్సి వస్తుందన్న కారణంగానే సురేష్ ప్రభు వాయిదా పడిందన్న వార్తలు వినిపిస్తున్నాయి.