విజయవాడ, జూన్ 21: సింగల్ హాల్ట్‌తో విజయవాడ - హైదరాబాద్ మధ్య నడుస్తున్న సూపర్ ఫాస్ట్ ఎక్స్‌ప్రెస్ (12795)కు ద్వితీయ విఘ్నం కలిగింది. రాజధాని ఉద్యోగుల తరలింపు కోసం రాష్ట్ర ప్రభుత్వ ఎంతో ప్రతిష్ఠాత్మకంగా కేంద్రాన్ని ఒప్పించి తీసుకు వచ్చిన ఈ రైలు గత రాత్రి కేంద్ర రైల్వే మంత్రి సురేష్ ప్రభు, సిఎం చంద్రబాబు జెండా ఊపి లాంభనంగా ప్రారంభించారు.

అయినవిల్లి, జూన్ 21: ఈ ఖరీఫ్‌లో క్రాప్ హాలిడేకు వెళ్లడానికి సమాయత్తమవుతున్న తూర్పు గోదావరి జిల్లాలోని కోనసీమ ప్రాంతానికి చెందిన మండలాల జాబితాలో తాజాగా మరో మండలం చేరింది. ఇప్పటికే ముమ్మిడివరం, అల్లవరం మండలాల్లో రైతులు ఈ దిశగా ముందుకువెళ్తుండగా మంగళవారం అయినవిల్లి మండల రైతులు కూడా జతకలిశారు. మంగళవారం మండలంలోని మాగాం గ్రామంలో జరిగిన సమావేశంలో క్రాప్ హాలిడే ప్రకటించాలని రైతులు నిర్ణయించారు.

హైదరాబాద్: గ్రూప్-1, గ్రూప్-2 పరీక్షలను విడివిడిగా నిర్వహించాలని, ఇంటర్వ్యూ విధానానికి స్వస్తి పలకాలని డిమాండ్ చేస్తూ నిరుద్యోగులు నగరంలోని ఎపి పబ్లిక్ సర్వీస్ కమిషన్ కార్యాలయం వద్ద మంగళవారం ఆందోళన చేశారు. వీరికి బిసి సంఘం నేత, టిడిపి ఎమ్మెల్యే ఆర్.కృష్ణయ్య మద్దతు పలికారు.

విశాఖ: అధిక మొత్తంలో ఫీజులు వసూలు చేసి బోర్డు తిప్పేసిన శ్రీమేధ కాలేజీ యాజమాన్యాన్ని కఠినంగా శిక్షించాలని విద్యార్థుల తల్లిదండ్రులు ఆందోళన చేపట్టారు. ఇక్కడి ఎంవిపి కాలనీలోని శ్రీమేధ కాలేజీలోకి విద్యార్థులు, తల్లిదండ్రులు మంగళవారం ప్రవేశించి ఫర్నిచర్‌ను, ఇతర సామగ్రిని ధ్వంసం చేశారు. ఇంటర్మీడియట్, సిఎ కోచింగ్‌లకు తాము కట్టిన ఫీజులను తిరిగి చెల్లించాలని తల్లిదండ్రులు డిమాండ్ చేశారు.