హైదరాబాద్: ఉపాధి హామీ పథకం కింద పనుల్లో పాల్గొంటున్న కూలీలకు ఇక రోజుకు 194 రూపాయల వేతనం చెల్లించాలని తెలంగాణ ప్రభుత్వం బుధవారం ఆదేశాలు జారీ చేసింది. ఇంతవరకూ వీరికి రోజుకు 180 రూపాయలు చెల్లించేవారు. పెంచిన వేతనాలకు సంబంధించిన ఉత్తర్వులు ఈ నెల 1 నుంచి అమలులోకి వస్తాయని ప్రభుత్వం పేర్కొంది.

హైదరాబాద్: ఇంకుడుగుంత లేకుంటే కొత్తగా ఇళ్ల నిర్మాణానికి అనుమతులు ఇవ్వరాదని పురపాలక శాఖ మంత్రి కెటిఆర్ అధికారులను ఆదేశించారు. జిహెచ్‌ఎంసి వందరోజుల ప్రణాళికపై బుధవారం జరిగిన సమీక్షలో ఆయన మాట్లాడుతూ, జలవనరులను పెంచేందుకు ఇంకుడుగుంతల నిర్మాణం తప్పనిసరి అన్నారు. నగరంలో అక్రమ నల్లా కనెక్షన్లను తొలగించాలని, పారిశుద్ధ్యం మెరుగుకు తగిన చర్యలు తీసుకోవాలని ఆయన అన్నారు.

హైదరాబాద్: అక్రమాలు జరుగుతున్నాయన్న నెపంతో తెలంగాణలోని ప్రైవేటు విద్యాసంస్థల్లో పోలీసులు తనిఖీలు చేయడాన్ని తాము వ్యతిరేకిస్తున్నామని ప్రైవేటు విద్యాసంస్థల జేఏసీ నాయకులు విద్యాశాఖామంత్రి కడియం శ్రీహరికి తెలిపారు. బుధవారం ఉదయం వారు కడియంను కలిసి తమ సమస్యలను విన్నవించారు. తనిఖీలు చేసేందుకు విద్యాశాఖ అధికారులను మాత్రమే అనుమతించాలని వారు విజ్ఞప్తి చేశారు.

హైదరాబాద్, ఏప్రిల్ 19: కేంద్ర ప్రభుత్వం ప్రవేశపెట్టిన ఇంద్ర ధనుష్ అమలులో రాష్ట్రంలో ఇప్పటికే 85 లక్ష్యాన్ని సాధించామని వంద శాతం లక్ష్యాన్ని చేరుకుని దేశంలో ఆదర్శంగా నిలుస్తామని వైద్య ఆరోగ్య శాఖ మంత్రి డాక్టర్ లక్ష్మారెడ్డి తెలిపారు. పిల్లలు వ్యాధుల బారిన పడకుండా వ్యాధి నిరోధక టీకాలు కార్యక్రమాన్ని మంత్రి ప్రారంభించారు.