హైదరాబాద్, ఏప్రిల్ 29: దేశంలోనే తెలంగాణ ధనిక రాష్టమ్రని ముఖ్యమంత్రి కె. చంద్రశేఖర్ రావు పలు సార్లు ప్రకటించినా, ఆరోగ్యశ్రీకి నిధులు కేటాయించకపోవడం దురదృష్టకరమని టి.పిసిసి ఉపాధ్యక్షుడు మల్లు రవి తెలిపారు. దీంతో ఈ పథకం మూలన పడే ప్రమాదం ఉందని ఆయన శుక్రవారం ఒక ప్రకటనలో పేర్కొన్నారు. ప్రభుత్వం ఆరోగ్యశ్రీ పథకానికి 300 కోట్లు బకాయి చెల్లించాల్సి ఉందన్నారు.

ఖమ్మం, ఏప్రిల్ 29: కాంగ్రెస్ వ్యతిరేక విధానాల వల్ల ఏర్పడిన తెలుగుదేశం పార్టీ పాలేరు ఉప ఎన్నికలో కాంగ్రెస్‌తో పొత్తు కలవటంతో ఎన్టీఆర్ ఆత్మక్షోభిస్తుందని ఉపముఖ్యమంత్రి కడియం శ్రీహరి, మంత్రి కల్వకుంట్ల తారక రామారావు అన్నారు. శుక్రవారం పాలేరు నియోజకవర్గ టిఆర్‌ఎస్ అభ్యర్థిగా తుమ్మల నాగేశ్వరరావు నామినేషన్ సందర్భంగా ఖమ్మంలో విలేఖరులతో మాట్లాడుతూ అనైతిక పొత్తులతో పార్టీలు వ్యవహరిస్తున్నాయన్నారు.

హైదరాబాద్: పాతబస్తీలోని ఓ ప్రసూతి ఆస్పత్రిలో వైద్యురాలిపై శుక్రవారం కొందరు మహిళలు దాడి చేశారు. పిల్లలకు టీకాలు ఇప్పించేందుకు వచ్చిన మహిళల పట్ల ఆస్పత్రి సిబ్బంది నిర్లక్ష్యంగా వ్యవహరించారు. దీంతో ఆగ్రహించిన మహిళలు వారితో వాగ్వివాదానికి దిగారు. ఈ క్రమంలో ఓ వైద్యురాలిపై కొందరు మహిళలు చేసుకున్నారు. సిబ్బంది ఫిర్యాదుపై పోలీసులు ఆస్పత్రికి చేరుకుని నిందితులను అరెస్టు చేశారు.

ఖమ్మం: పాలేరు ఉపఎన్నికలో గెలుపుకోసం సాక్షాత్తూ సిఎం కెసిఆర్ అధికార దుర్వినియోగానికి పాల్పడుతున్నారని, మంత్రులను ప్రచారానికి పంపుతున్నందున ప్రభుత్వ యంత్రాంగాన్ని వాడుకుంటున్నారని టి.పిసిసి చీఫ్ ఉత్తమ్‌కుమార్‌రెడ్డి శుక్రవారం ఇక్కడ మీడియాతో చెప్పారు. ప్రజాబలంతో పాటు రాంరెడ్డి వెంకటరెడ్డి కుటుంబానికి ఉన్న ఆదరణతో పాలేరులో తమ అభ్యర్థి సుచరిత గెలవడం ఖాయమన్నారు.