హైదరాబాద్, ఏప్రిల్ 29: సచివాలయంలో పదవీ బాధ్యతల స్వీకరణలతో శుక్రవారం సందడి నెలకొంది. మంత్రుల శాఖలలో ఇటీవల జరిగిన చేర్పులు, మార్పుల మేరకు కొత్తగా అప్పగించిన శాఖల బాధ్యతలను మంత్రులు చేపట్టారు. పంచాయతీరాజ్, గ్రామీణాభివృద్ధిశాఖ మంత్రిగా జూపల్లి కృష్ణారావు, పాడి పరిశ్రమ, పశుసంవర్ధక, మత్స్యశాఖల మంత్రిగా తలసాని శ్రీనివాస్ యాదవ్, సహకారశాఖ మంత్రిగా పోచారం శ్రీనివాస్‌రెడ్డి పదవీ బాధ్యతలను చేపట్టారు.

హైదరాబాద్, ఏప్రిల్ 29: రంగారెడ్డి జిల్లా మోమిన్‌పేట్ పోలీస్ స్టేషన్‌లో జరిగిన లాకప్ డెత్‌పై జుడిషియల్ మెజిస్ట్రేట్‌చే విచారణ జరిపించాలని హైకోర్టు జస్టిస్ రామలింగేశ్వర రావు శుక్రవారం ఆదేశించారు. 2007లో మోమిన్‌పేట్ పోలీస్ స్టేషన్లో ఇబ్రహీం అనే వ్యక్తి లాకప్‌లో మృతి చెందాడు. ఈ మేరకు న్యాయ విచారణ జరిపించి బాధ్యులను శిక్షించాలని కోరుతూ ఇబ్రహీం భార్య నజ్మా కోర్టును ఆశ్రయించింది.

హైదరాబాద్, ఏప్రిల్ 29: ప్రైవేటు విద్యాసంస్థల్లో తనిఖీలు విద్యాశాఖ అధికారులే చేపట్టాలి తప్ప పోలీసులతో కాదని టిపిసిసి తెలంగాణ ఉన్నత విద్యామండలి చైర్మన్ ప్రొ.టి.పాపిరెడ్డిని కోరింది. ఎంతోమందిని విద్యావంతులు చేసి ఉన్నత స్థానానికి పంపిన ప్రైవేటు విద్యాసంస్థల యాజమాన్యాలను కొత్తగా ఏర్పడిన తెలంగాణ ప్రభుత్వం ఇబ్బందులకు గురి చేయవద్దని కోవద్దని కోరింది.

హైదరాబాద్, ఏప్రిల్ 29: రాష్ట్రంలో వర్షాభావంతో నెలకొన్న కరువు పరిస్థితుల వల్ల అవసరమైన చోట పశుగ్రాస కేంద్రాలను ఏర్పాటు చేయబోతున్నట్టు పశుసంవర్ధకశాఖ మంత్రి తలసాని శ్రీనివాస్ యాదవ్ వెల్లడించారు. పాడి, మత్స్య, పశుసంవర్ధకశాఖల మంత్రిగా శుక్రవారం బాధ్యతలు చేపట్టిన తర్వాత సంబంధిత శాఖల అధికారులతో మంత్రి తలసాని శ్రీనివాస్ యాదవ్ సమీక్షా సమావేశం నిర్వహించారు.