హైదరాబాద్: పాలేరు ఉపఎన్నిక సందర్భంగా ఖమ్మం జిల్లాలో ఎన్నికల నియమావళి అమలులో ఉన్నప్పటికీ, మేడే రోజున ఉత్సవాలు జరిపేందుకు అనుమతివ్వాలని ఎన్నికల ప్రధాన అధికారి భన్వర్‌లాల్‌ను బుధవారం కలిసి సిఐటియు నేతలు విజ్ఞప్తి చేశారు.

హైదరాబాద్: తీవ్ర కరవు పరిస్థితులు ఏర్పడి సాగునీటికి,తాగునీటికి ఇబ్బందులు ఎదురవుతున్నా తెలంగాణ ప్రభుత్వం స్పందించడం లేదని పలువురు కాంగ్రెస్ నాయకులు ఉమ్మడి రాష్ట్రాల గవర్నర్ నరసింహన్‌కు బుధవారం ఫిర్యాదు చేశారు. రాజ్‌భవన్‌లో గవర్నర్‌ను కలిసిన సందర్భంగా తెలంగాణలో కరవు తీవ్రతను వారు వివరించారు. రైతులను ఆదుకునేలా ప్రభుత్వాన్ని ఆదేశించాలని వారు విజ్ఞప్తి చేశారు.

ఆదిలాబాద్: బెజ్జూరు మండలం గూడెం వద్ద మంగళవారం రాత్రి మావోయిస్టులు ప్రవేశించి వంతెన నిర్మాణంలో పాల్గొంటున్న కూలీలను బెదిరించారు. నిర్మాణ స్థలం వద్ద పొక్లెయిన్, టిప్పర్, ట్రాక్టర్, ఇతర సామగ్రిని వారు తగులబెట్టి బీభత్సం సృష్టించారు. కూలీల నుంచి 25 సెల్‌ఫోన్లను పట్టుకుపోయారు. ఈ ఘటనలో నలుగురు మావోయిస్టులు పాల్గొన్నట్లు సమాచారం.

ఖమ్మం: తెరాస ప్లీనరీ సందర్భంగా బుధవారం ఇక్కడ ఆ పార్టీ కార్యాలయ భవన నిర్మాణానికి తెలంగాణ సిఎం కెసిఆర్ శంకుస్థాపన చేశారు. జిల్లా మంత్రి తుమ్మల నాగేశ్వరరావు, పార్టీ నాయకులు పాల్గొన్నారు.