నిజామాబాద్: తెలంగాణ ముఖ్యమంత్రి కెసిఆర్ శుక్రవారం నిజామాబాద్ జిల్లా నర్సింగ్‌పల్లిలోని వేంకటేశ్వర ఆలయాన్ని సతీసమేతంగా సందర్శించి పూజలు చేశారు. కల్యాణోత్సవాల సందర్భంగా స్వామివారికి పట్టువస్త్రాలు, ముత్యాల తలంబ్రాలను ఆయన సమర్పించారు. కెసిఆర్ కుమార్తె, నిజామాబాద్ ఎంపి కవిత, మంత్రులు ఇంద్రకరణ్ రెడ్డి, పోచారం శ్రీనివాస రెడ్డి పాల్గొన్నారు.

హైదరాబాద్: ఓ ప్రైవేటు స్కూల్‌కు చెందిన వాహనం శుక్రవారం నల్లకుంట సమీపంలోని విద్యానగర్‌లో బీభత్సం సృష్టించింది. బ్రేకులు ఫెయిల్ కావడంతో అదుపుతప్పిన ఈ వ్యాన్ ఒక్కసారి పాదచారులపై దూసుకుపోయింది. వ్యాన్ ఢీకొనడంతో సాయి ప్రకాష్ అనే చిరుద్యోగి అక్కడికక్కడే ప్రాణాలు కోల్పోయాడు. వ్యాన్ డ్రైవర్‌ను పోలీసులు అరెస్టు చేశారు.

హైదరాబాద్: నగరంలోని చారిత్రక కట్టడమైన చార్మినార్ వద్ద ఫుట్‌పాత్‌ల నిర్మాణాన్ని ఆరునెలల్లోగా పూర్తి చేస్తామని పురపాలక మంత్రి కెటిఆర్ చెప్పారు. ఆయన శుక్రవారం మేయర్ రామ్మోహన్, గ్రేటర్ కమిషనర్ జనార్దన రెడ్డితో కలిసి చార్మినార్ ప్రాంతంలో పర్యటించారు. ఇక్కడ ట్రాఫిక్‌ను నియంత్రించేలా ఇన్నర్, అవుటర్ రింగ్ రోడ్డులు నిర్మిస్తామని, నగర చరిత్రను తెలిపేలా ఆర్టు గ్యాలరీని ఏర్పాటు చేస్తామన్నారు.

నల్గొండ: వేసవిలో ప్రజల దాహార్తిని తీర్చేందుకు కృష్ణాబోర్డు ఆదేశాల మేరకు అధికారులు నాగార్జున సాగర్ ఎడమకాలువకు శుక్రవారం ఉదయం మూడు వేల క్యూసెక్కుల నీటిని విడుదల చేశారు. ప్రజల తాగునీటి అవసరాలకు 4.5 టిఎంసిల నీటిని వినియోగించుకునే వీలుంది. ప్రస్తుతం సాగర్ జలాశయంలో నీటిమట్టం 508 అడుగుల మేరకు ఉంది.