న్యూఢిల్లీ, మే 12: మద్యం వ్యాపారి విజయ్ మాల్యాను దేశంనుంచి పంపించి వేయడానికి బ్రిటన్ నిరాకరించిన తర్వాత మనీ లాండరింగ్ కేసులో దర్యాప్తు అధికారులకు సహకరించేలా చేయడం కోసం ఆయనపై ఇంటర్‌పోల్ అరెస్టు వారెంట్ జారీ చేయాలని ఎన్‌ఫోర్స్‌మెంట్ డైరెక్టరేట్ కోరింది. అంతర్జాతీయ పోలీసు సంస్థ అయిన ఇంటర్‌పోల్‌నుంచి రెడ్‌కార్నర్ నోటీసు సంపాదించాలని ఇడి సిబిఐకి ఒక లేఖ రాసిందని విశ్వసనీయ వర్గాలు తెలిపాయి.

న్యూఢిల్లీ, మే 12: వెనుకబడిన తరగతుల వారి సమస్యలు పరిష్కరించాలని బిసి సంఘం నేత ఆర్ కృష్ణయ్య డిమాండ్ చేశారు. ఈమేరకు కేంద్ర సామాజిక న్యాయం, సాధికారిత మంత్రి తవర్‌చంద్ గెహ్లాట్, కేంద్ర కార్మిక మంత్రి బండారు దత్తాత్రేయ, కర్నాటక సిఎం సిద్దరామయ్యను గురువారం ఇక్కడ కలిశారు. కృష్ణయ్య మాట్లాడుతూ ఎన్‌డిఏ ప్రభుత్వం అధికారంలోకి వచ్చి రెండేళ్లయినా బిసిల సమస్యలు పరిష్కరించలేదని ఆరోపించారు.

న్యూఢిల్లీ, మే 12: కాంగ్రెస్ సభ్యుడు ప్రవీణ్ రాష్టప్రాల్ (76) ఆకస్మికంగా మృతిచెందడంతో గురువారం నిరవధికంగా వాయిదా పడవలసిన రాజ్యసభ ఆయనకు సంతాపం తెలిపిన అనంతరం రేపటి వరకు వాయిదా పడింది. సీనియర్ కాంగ్రెస్ నేత, గుజరాత్ నుండి రాజ్యసభకు ప్రాతినిధ్య వహిస్తున్న రాష్టప్రాల్ గురువారం ఉదయం గుండెపోటుతో ఢిల్లీలోని తన నివాసంలో మృతిచెందారు.

న్యూఢిల్లీ, మే 12: దేశ రాజధాని ఢిల్లీ పౌరులకు సంతోషం కలిగించే వార్త! గత ఏడాది ప్రపంచంలోనే అత్యంత కాలుష్యనగరంగా అపఖ్యాతి మూటగట్టుకున్న ఢిల్లీకి ఇప్పుడు అలాంటి పరిస్థితి లేదు. ప్రపంచ ఆరోగ్య సంస్థ(డబ్ల్యూటిఓ) తాజాగా వెల్లడించిన జాబితాలో ఢిల్లీ 11వ స్థానానికి చేరుకుంది. ప్రపంచ ఆరోగ్యం సంస్థ 103 దేశాల్లోని మూడు వేల నగరాల్లో అధ్యయనం చేసి తన తాజా నివేదికను వెల్లడించింది.