కాన్పూర్, మే 22: కాంగ్రెస్ వంశపారంపర్య రాజకీయాలను ఆర్థిక మంత్రి అరుణ్ జైట్లీ దుయ్యబడుతూ ఒక కుటుంబం (గాంధీ-నెహ్రూ) పట్ల ఆకర్షణ ముగిసిపోవడంతో కాంగ్రెస్ పార్టీ దానికి మూల్యం చెల్లించాల్సి వస్తోందన్నారు. ఆదివారం ఆయన ఇక్కడ బిజెపి కార్యకర్తల సమావేవంలో మాట్లాడుతూ, కాంగ్రెస్ పార్టీ పార్లమెంటులో అభివృద్ది నిరోధక ప్రతిపక్షంగా ప్రవర్తిస్తోందని, అయితే అది కూడా ఆ పార్టీకి ఏమాత్రం తోడ్పడడం లేదని అన్నారు.

గౌహతి, మే 22: అసోంలో బిజెపి విజయ బావుటా ఎగురవేయడంలో కీలక పాత్ర పోషించిన సర్బానంద సోనోవాల్ లెజిస్లేచర్ పార్టీ నేతగా ఏకగ్రీవంగా ఎన్నికయ్యారు. అసెంబ్లీ ఎన్నికల ఫలితాల అనంతరం తొలిసారిగా ఆదివారం జరిగిన లెజిస్లేచర్ పార్టీ సమావేశంలో సోనోవాల్‌ను పార్టీ నేతగా ఎన్నుకున్నారు. ఈ సమావేశానికి బిజెపి కేంద్ర కమిటీ తరపున పరిశీలకుడుగా కేంద్ర మంత్రి తవార్ చంద్ గెహ్లాట్ హాజరయ్యారు.

లక్నో, మే 22: ఉత్తరప్రదేశ్‌లో ఒకేరోజు జరిగిన నాలుగు రోడ్డు ప్రమాదాల్లో 10మంది దుర్మరణం చెందారు. మరో 18మందికి తీవ్ర గాయాలయ్యాయి. బరేలి, బండా, బల్లియా, షాజనాపూర్ జిల్లాల్లో ఈ ప్రమాదాలు చోటుచేసుకున్నాయి. బరేలీ జిల్లాలోని బహేది ప్రాంతంలో కారు, ట్రాక్టర్ ట్రాలీ ఢీకొనడంతో ఒకే కుటుంబానికి చెందిన ముగ్గురు మృతిచెందగా, మరో ముగ్గురు గాయపడ్డారు.

జకార్తా, మే 22: ఇండోనేసియాలో ఓ అగ్నిపర్వతం బద్దలై, దాన్నుంచి వెలువడిన లావాలో ఆరుగురు చనిపోయారు. ఉత్తర సుమత్రా ప్రావిన్స్‌లో ఉన్న సినాబంగ్ పర్వతం శనివారం బద్దలైందని.. దాదాపు మూడు కిలోమీటర్ల ఎత్తులో లావా వెలువడిందని.. సహాయకులకు ఆరు మృత దేశాలు లభ్యమైనట్లు ఇండోనేసియా జాతీయ విపత్తు నిర్వహణ కమిటీ ప్రతినిధి సుతొపోపూర్వో నుగ్రోహొ తెలిపారు.