దిల్లీ: ఉత్తరాఖండ్ ముఖ్యమంత్రి హరీష్ రావత్ మంగళవారం ఉదయం ఇక్కడి సిబిఐ కార్యాలయంలో అధికారులు జరిపిన విచారణకు హాజరయ్యారు. కాంగ్రెస్ ఎమ్మెల్యేలకు లంచం ఇస్తున్నట్లు స్ట్రింగ్ ఆపరేషన్‌కు సంబంధించి ప్రచారంలో ఉన్న వీడియోపై ఆయనను ప్రశ్నించారు. ఉత్తరాఖండ్ అసెంబ్లీలో ఇటీవల జరిగిన బలపరీక్షలో నెగ్గి రావత్ ముఖ్యమంత్రి పీఠాన్ని మళ్లీ అధిష్ఠించిన నేపథ్యంలో సిబిఐ అధికారులు విచారించడం ఇపుడు చర్చనీయాంశమైంది.

దిల్లీ: స్మార్ట్ సిటీల రెండో జాబితాను కేంద్ర పట్టణాభివృద్ధి శాఖ మంత్రి వెంకయ్య నాయుడు ఈరోజు ఇక్కడ ప్రకటించారు. రెండో జాబితాలో తెలంగాణకు చెందిన వరంగల్‌కు స్థానం లభించింది. ఇంకా కోల్‌కత, చండీగఢ్, ధర్మశాల, లక్నో, రాంచీ, రాయ్‌పూర్ సహా 13 నగరాలను ఈ జాబితాలో చేర్చారు. నగరాల్లో వౌలిక వసతులను కల్పించేందుకు స్మార్ట్ సిటీస్, అమృత్ పథకాలను కేంద్రం అమలు చేస్తోంది.

హైదరాబాద్, మే 23: మంచినీటి ఎద్దడితో తల్లడిల్లిపోతున్న పాలమూరు జిల్లా ప్రజల దాహార్తిని తీర్చడానికి కర్నాటక ప్రభుత్వం ఒక టిఎంసి నీటిని పంపి, తన ఔదార్యం చాటుకుంది. జిల్లాలో నెలకొన్న మంచి ఎద్దడి తీర్చడానికి కర్నాటకలోని నారాయణపూర్ డ్యామ్ నీరు విడుదల చేయాలని రాష్ట్ర నీటి పారుదల హరీశ్‌రావు చేసిన విజ్ఞప్తి మేరకు కృష్ణా జలాలు సోమవారం జూరాలకు చేరుకున్నాయి.

సూళ్లూరుపేట, మే 23: ఒకప్పుడు చిరుదీవిగా ఉన్న శ్రీహరికోట భారత అంతరిక్ష పరిశోధన సంస్థకు స్పేస్ పోర్టుగానే కాకుండా రాకెట్ ప్రయోగాలకు గుండెకాయలా మారింది. అంతేకాకుండా ప్రపంచ వ్యాప్తంగా భారతదేశానికి పేరుప్రతిష్టలు తెచ్చిపెడుతోంది. బంగాళాఖాతం సముద్ర మట్టానికి ఏటవాలుగా ఉండటంతో ఈ ప్రాంతాన్ని రాకెట్ ప్రయోగాలకు అనువైనదని 1971లో అప్పటి అంతరిక్ష పితామహుడు విక్రమ్ సారాభాయ్ నేతృత్వంలో ఎంపిక చేశారు.