విజయవాడ: విశాఖ నగరం కేంద్రంగా ఐటి రంగాన్ని అభివృద్ధి చేసేందుకు కృషి చేస్తామని ఎ.పి. సి.ఎం. చంద్రబాబు ప్రకటించారు. మైక్రోసాఫ్ట్ సిఇవో సత్య నాదెళ్లతో భేటీ అనంతరం ఆయన విలేకరులతో మాట్లాడుతూ విశాఖ, అనంతపురం ప్రాంతాల్లో ఐటిని అభివృద్ధి చేసేందుకు ప్రణాళికలు సిద్ధం చేస్తామన్నారు. ఈ రెండు జిల్లాల్లోనూ పర్యటించాల్సిందిగా సత్య నాదెళ్లను ఆయన ఆహ్వానించారు.

విశాఖ: విశాఖ ఏజెన్సీ ప్రాంతంలో చలి తీవ్రత పెరుగుతోంది. పాడేరు, చింతపల్లిలో 11 డిగ్రీలు, మినుములూరు, లంబసింగిలో 9 డిగ్రీల ఉష్ణోగ్రత నమోదయింది. దట్టంగా పొగమంచు అలముకోవటంతో రహదారులపై వాహనాల రాకపోకలకు ఇబ్బంది కలుగుతోంది.

హైదరాబాద్: కొత్త సంవత్సరం, సంక్రాంతి సందర్భంగా హైదరాబాద్ నుంచి తెలంగాణ, ఆంధ్రల్లోని వివిధ ప్రాంతాలకు 2,715 బస్సులను నడపాలని తెలంగాణ ఆర్టీసీ నిర్ణయించింది. అన్ని జిల్లా కేంద్రాలకు ఈ ప్రత్యేక బస్సులు నడుపుతారు. రద్దీ పెరిగితే మరిన్ని సర్వీసులను అందుబాటులోకి తెస్తారు. అవసరమైతే ఎపిఎస్ ఆర్టీసీకి 500 బస్సులను ఇచ్చేందుకు కూడా ప్రతిపాదించారు. జనవరి 1 నుంచి 20 వరకూ ప్రత్యేక బస్సులను నడుపుతారు.

శ్రీకాకుళం: మద్యం వ్యాపారుల నుంచి లంచం తీసుకుంటుండగా శ్రీకాకుళం జిల్లా పలాసకు చెందిన ఎక్సయిజ్ ఎస్‌ఐ, అయిదుగురు కానిస్టేబుళ్లను సోమవారం ఎసిబి అధికారులు వలపన్ని పట్టుకున్నారు. నిందితుల నుంచి నగదును స్వాధీనం చేసుకుని కేసులు నమోదు చేశారు.