అనారోగ్యంతో శుక్రవారం హైదరాబాద్ నిమ్స్‌లో కన్నుమూసిన మాజీ మంత్రి మెట్ల సత్యనారాయణరావు అంత్యక్రియలు శనివారం తూర్పు గోదావరి జిల్లా అమలాపురంలో అధికార లాంఛనాలతో నిర్వహించారు. ముఖ్యమంత్రి చంద్రబాబునాయుడు, ఆయన కుమారుడు లోకేష్, ఉప ముఖ్యమంత్రి నిమ్మకాయల చినరాజప్ప తదితరులు హాజరై మెట్లకు నివాళులర్పించారు.

చంద్రగిరి : శేషాచలం అటవీప్రాంతంలో కూంబింగ్ సిబ్బంది అడవిలో గాలిస్తుండగా సుమారు 40 మంది ఎర్రచందనం కూలీలు దుంగలు మోసుకొస్తూ ఎదురుపడ్డారు. ఈ సందర్భంగా పోలీసులు గాల్లో కాల్పులు జరిపారు. 33 ఎర్రచందనం దుంగలు, ముగ్గురు వ్యక్తులను అదుపులోకి తీసుకున్నట్లు తిరుపతి డిఎస్పీ శ్రీనివాసులు శనివారం విలేఖర్లకు తెలిపారు.

కడప : ఎర్రచందనం స్మగ్లర్లను తరిమికొడితే కేసులు ఉండవని రాయలసీమ జోన్ ఐజి గోపాలకృష్ణ అన్నారు. నల్లమల, శేషాచలం అటవీ పరిసర ప్రాంతాల్లోని యువకులు, ప్రజలు కలసికట్టుగా ఎర్రచందనం స్మగ్లర్లు, కూలీలను తరమికొట్టాలని పిలుపునిచ్చారు.ప్రస్తుతం అడవుల్లో బేస్‌క్యాంపులు, 280 సిసి కెమెరాలు ఏర్పాటు చేశామన్నారు.

మడకశిర: అనంతపురం జిల్లా మడకశిర మండలంలోని భక్తరహళ్లి లక్ష్మీనరసింహస్వామి, జిల్లేడుకుంట ఆంజనేయస్వామి బ్రహ్మోత్సవాల్లో భాగంగా శనివారం భూతప్పల ఉత్సవం కన్నులపండువగా జరిగింది. భూతప్పలు భక్తులపై నుంచి నడుచుకుంటూ వెళ్లే దృశ్యాన్ని తిలకించేందుకు జనం భారీగా తరలివచ్చారు. భూతప్ప విగ్రహాన్ని చేతపట్టుకున్న వారి కాలిస్పర్శ తగిలితే కోర్కెలు తీరుతాయని భక్తుల నమ్మకం.