హైదరాబాద్, మే 31: ఆంధ్రప్రదేశ్‌లో ఇంజనీరింగ్ కాలేజీల్లో నాణ్యతా ప్రమాణాలను పాటించడం ద్వారానే మరింత మెరుగైన విద్యను విద్యార్ధులకు అందించడం సాధ్యమవుతుందని మానవ వనరుల మంత్రి గంటా శ్రీనివాసరావు పేర్కొన్నారు. మంగళవారం ఉదయం ఆయన సచివాలయంలో తన చాంబర్‌లో ఉన్నత విద్యపై అధికారులతో సమీక్ష నిర్వహించారు. నాణ్యతా ప్రమాణాలతోనే విద్యార్థులకు ఎక్కువగా ఉద్యోగాలు వచ్చే అవకాశం ఉంటుందని చెప్పారు.

హైదరాబాద్, మే 31: పోర్టుల అభివృద్ధికి విస్తృ త అవకాశాలు ఉన్నాయని, జర్మనీ సహా పలు దేశాలకు చెందిన పారిశ్రామికవేత్తలు రాష్ట్రంలో పెట్టుబడులు పెట్టేందుకు ఆసక్తి చూపుతున్నారని రాష్ట్ర సాంఘిక సంక్షేమ మంత్రి రావెల కిశోర్‌బాబు చెప్పారు. ఐదు రోజుల పర్యటనకు జర్మనీ వెళ్లిన మంత్రి జర్మనీ హాంబర్గ్‌పోర్టును సందర్శించారు.

విజయవాడ: నగరంలోని ఓ ప్రైవేటు ఆస్పత్రిలో వైద్యం వికటించి మహిళ మరణించగా ఆమె బంధువులు ఆందోళన చేపట్టారు. పోలీసులు రంగ ప్రవేశం చేసి విచారణ చేస్తామని హామీ ఇవ్వడంతో వారు ఆందోళన విరమించారు. కాగా, మహిళ మృతికి కారకుడైన వైద్యుడు పరారీలో ఉన్నాడని పోలీసులు తెలిపారు.

గుంటూరు: వినుకొండలో కొద్దిరోజుల క్రితం బషీరున్ అనే మహిళ ఆత్మహత్యకు సంబంధించి ఆమె ఇద్దరు కొడుకులు, కోడళ్లను పోలీసులు అరెస్టు చేసి విచారిస్తున్నారు. ఇంట్లో వేధింపులు తాళలేక బషీరున్ ఎత్తయిన భవనం నుంచి కిందకు దూకి ఆత్మహత్య చేసుకుంది.