విజయవాడ: ఎపి మంత్రిమండలి సమావేశం ముఖ్యమంత్రి చంద్రబాబు అధ్యక్షతన బుధవారం ఉదయం ఇక్కడ ప్రారంభమైంది. ఈ నెల 2న జరిగే నవనిర్మాణ దీక్ష, రెండేళ్ల పాలన, కొత్తగా ఉద్యోగ నియామకాలు, వివిధ సంస్థలకు స్థలాల కేటాయింపు, రాజధాని నిర్మాణం, హైదరాబాద్ నుంచి ఉద్యోగుల తరలింపు, సంక్షేమ పథకాల అమలు తీరు, కొత్త పథకాలకు రూపకల్పన వంటి పలు కీలక అంశాలపై చర్చ జరుగుతోందని సమాచారం.

విశాఖ: విశాఖ జిల్లా ఎస్పీ రాహుల్‌దేవ్ శర్మ సమక్షంలో బుధవారం ఉదయం మహిళా మావోయిస్టులు కడబాల లక్ష్మి (సరిత), విజయ, కోనంగి రాములమ్మ (భరతక్క) లొంగిపోయారు. ఎపి, ఒడిశా, చత్తీస్‌గఢ్‌ల్లో వీరిపై పలు కేసులున్నాయి. లక్ష్మి, రాములమ్మలపై 4 లక్షల రివార్డు ఉంది. మరికొంత మంది మావోయిస్టులు కూడా లొంగిపోయేందుకు సిద్ధంగా ఉన్నారని ఎస్పీ తెలిపారు.

విశాఖ: అనకాపల్లి వద్ద శారదా నది నీటిని విశాఖ స్టీల్‌ప్లాంట్‌కు తరలిస్తే తాము సహించేది లేదని మాజీ మంత్రి దాడి వీరభద్రరావు హెచ్చరించారు. నీటి తరలింపు ప్రతిపాదనలను వ్యతిరేకిస్తూ బుధవారం ఉదయం ఆయన తుమ్మపాల వద్ద రైతులతో కలిసి ఆందోళనకు దిగారు. రైతుల ప్రయోజనాలను కాదని నీటిని తరలించాలనుకోవడం దారుణమన్నారు.

హైదరాబాద్, మే 31: నాలుగో అభ్యర్థి బరిలో ఉంటారా? లేరా? ఒకవేళ ఉంటే క్యాంపుల్లోకి వెళ్లిన ఎమ్మెల్యేలతో ఎలా ఓట్లు వేయిస్తారు? ఇదీ మంగళవారం ఉదయం వరకూ టిడిపి, వైసీపీ నేతలను ఉత్కంఠ పరిచిన అంశం. రాజ్యసభ ఎన్నికల్లో నాలుగో అభ్యర్థి పోటీపై టిడిపి నాయకత్వం సోమవారం నుంచి మంగళవారం ఉదయం వరకూ ఉత్కంఠను కొనసాగించి, చివరకు ముగ్గురితోనే కథ ముగించింది.