నిజామాబాద్: నవీపేట మండలం సిర్లపల్లి వద్ద గురువారం అర్ధరాత్రి ఇసుకతో వెళ్తున్న ట్రాక్టర్ బోల్తాపడి ఇద్దరు కూలీలు మరణించారు. గాయపడిన ముగ్గురిని ఆస్పత్రికి తరలించారు. రాత్రివేళ అక్రమంగా ఇసుకను తరలిస్తున్నందున తరచూ ఇలాంటి ప్రమాదాలు జరుగుతున్నాయి.

తాండూరు రూరల్: రంగారెడ్డి జిల్లా తాండూరులో గురువారం ఇంటి ముందు ఆడుకుంటున్న అక్కాచెల్లెళ్లను పాము కాటు వేసింది. పట్టణంలోని రహమత్‌నగర్‌కు చెందిన అబ్దుల్, ఫాతిమా దంపతుల కూతుళ్లు సనాబేగం(6), సౌలీబేగం(3)లు ఇంటి ముందు ఆడుకుంటుండగా.. పాము కాటు వేసింది. దీంతో ఆస్పత్రికి తరలించడానికి ప్రయత్నిస్తుండగా.. సౌలీబేగం మృతిచెందింది. సనాబేగంను మెరుగైన చికిత్స కోసం హైదరాబాద్‌కు తరలించారు.

హైదరాబాద్: జిహెచ్‌ఎంసి ఎన్నికల్లో నామినేషన్ల ఉపసంహరణకు ఈ రోజు మధ్యాహ్నం మూడు గంటలతో గడువు ముగుస్తుంది. పలు వార్డుల్లో వివిధ పార్టీల తరఫున ఒకరి కంటే ఎక్కువ మంది నామినేషన్లు వేశారు. రెబల్స్‌గా బరిలో దిగిన వారిని బుజ్జగించేందుకు టిఆర్‌ఎస్, కాంగ్రెస్, బిజెపి నేతలు ప్రయత్నిస్తున్నారు. ఉపసంహరణ గడువులోగా అభ్యర్థులు సంబంధిత పార్టీల నుంచి బి-్ఫరాలను సమర్పించాల్సి ఉంది

హైదరాబాద్: దళిత విద్యార్థి రోహిత్ ఆత్మహత్య అనంతరం ఐదో రోజు గురువారం కూడా హెచ్‌సియులో బంద్ కొనసాగుతోంది. విద్యార్థుల ఆందోళనకు మద్దతు తెలిపేందుకు దిల్లీ సి.ఎం. కేజ్రీవాల్, సిపిఐ నేతలు సురవరం సుధాకర్‌రెడ్డి, మాజీ ఎం.పి. అజీజ్ పాషా తదితరులు ఈ రోజు వర్శిటీకి వస్తున్నారు. రాజకీయ నేతల తాకిడి అధికం కావడంతో పోలీసులు విస్తృత బందోబస్తు ఏర్పాటు చేశారు.