హైదరాబాద్: నియోజకవర్గం అభివృద్ధి నిధుల కింద ఎమ్మెల్యేలకు ఇస్తున్న మొత్తాన్ని కోటిన్నర నుంచి మూడు కోట్ల రూపాయలకు పెంచుతున్నట్లు తెలంగాణ అసెంబ్లీలో సిఎం కెసిఆర్ మంగళవారం ప్రకటించారు. ఈ మేరకు వెంటనే ఆదేశాలు ఇస్తామన్నారు. ఎమ్మెల్యేలకు ఈ నిధులను 5 కోట్లకు పెంచాలని కాంగ్రెస్ సభ్యుడు జానారెడ్డి చేసిన సూచనపై సిఎం స్పందిస్తూ ఈ ప్రకటన చేశారు.

హైదరాబాద్: సత్ప్రవర్తన కలిగిన ఖైదీలను విడుదల చేసేందుకు తెలంగాణ ప్రభుత్వం జీవో విడుదల చేయడంతో మంగళవారం నాడు వివిధ జైళ్ల నుంచి 251 మంది ఖైదీలు విడుదలయ్యారు. వీరిలో 190 మంది జీవిత ఖైదీలున్నారు. వీరిని జనవరి 26న విడుదల చేయాల్సి ఉండగా కొన్ని కారణాల వల్ల జాప్యం జరిగింది.

హైదరాబాద్: కొద్దిరోజులుగా అగ్నిగుండంగా మారిన ఎపి, తెలంగాణల్లో ప్రస్తుతం పగటి ఉష్ణోగ్రతలు 2 నుంచి 3 డిగ్రీల మేరకు తగ్గాయి. దక్షిణాది నుంచి వస్తున్న గాలులతో పాటు మబ్బు వాతావరణం ఉండడంతో ఈరోజు అక్కడక్కడా వర్షం కురిసే అవకాశం ఉంది. చత్తీస్‌గఢ్ ప్రాంతంలో ఏర్పడిన ద్రోణి ప్రభావంతో ఉత్తర కోస్తాలో వాతావరణం చల్లబడింది. కోస్తా, తెలంగాణ, రాయలసీమలో వేడి తగ్గడంతో పాటు కొన్ని చోట్ల చిరుజల్లులు కురిశాయి.

హైదరాబాద్: ప్రస్తుతం విశ్వవిద్యాలయాల్లో పరిస్థితులను చక్కదిద్దేందుకు వర్సిటీల చట్టానికి సవరణలు తెస్తున్నట్లు తెలంగాణ విద్యామంత్రి కడియం శ్రీహరి అసెంబ్లీలో మంగళవారం తెలిపారు. వీసీల నియామకంలో పారదర్శకత పాటించేలా తమ ప్రభుత్వం ప్రయత్నిస్తోందన్నారు. వీసీలు లేక చాలా విశ్వవిద్యాలయాల్లో పనితీరు ఘోరంగా ఉందని కాంగ్రెస్ ఎమ్మెల్యేలు విమర్శించారు.