న్యూఢిల్లీ, మే 20: అత్యంత వివాదాస్పదమైన నీట్ (జాతీయ అర్హత ప్రవేశ పరీక్ష)ను ఏడాదిపాటు వాయిదా వేయాలని కేంద్ర ప్రభుత్వం నిర్ణయించింది. రాష్ట్రాల బోర్డులకు మాత్రమే నీట్ పరీక్ష ఏడాదిపాటు వాయిదా వేశారని, కేంద్రం పరిధిలోని వైద్య కాలేజీలు, ప్రైవేట్ మెడికల్ కాలేజీలు, డీమ్డ్ వర్శిటీల్లోని యాజమాన్య కోటా సీట్లకు ఈ ఏడాది నీట్ పరీక్ష పాస్ కావలసిందేనని అంటున్నారు.

ముంబయి: తాజాగా జరిగిన 5 రాష్ట్రాల అసెంబ్లీ ఎన్నికల్లో ప్రధాని మోదీ మ్యాజిక్ ఏమీ పనిచేయలేదని శివసేన పార్టీ వ్యాఖ్యానించింది. ఎన్నికల ఫలితాలపై శివసేన పార్టీ పత్రిక ‘సామ్నా’లో కొన్ని ఆసక్తికరమైన విమర్శలు చోటుచేసుకున్నాయి. అస్సాంలో ప్రాంతీయ పార్టీలను కలుపుకుపోవడం వల్లే బిజెపి విజయం సాధించిందని, బిహార్ ఎన్నికల తర్వాత ఈ విజయం ఆ పార్టీకి కొంత ఊరటనిచ్చిందని శివసేన పేర్కొంది.

రాంచీ: విశాఖ, రాంచీ, పాట్నా రైల్వేస్టేషన్లలో వైఫై సేవలను రైల్వే మంత్రి సురేష్ ప్రభు శుక్రవారం ప్రారంభించారు. రైల్వే స్టేషన్లలో వేచి ఉండే ప్రయాణికులు ఉచితంగా ఇంటర్నెట్‌ను వీక్షించేందుకు వైఫై సేవలను అందుబాటులోకి తెచ్చారు. భవిష్యత్‌లో 400 స్టేషన్లలో ఈ సేవలను అందించేందుకు కృషి చేస్తున్నట్లు రైల్వే మంత్రి తెలిపారు.

కోల్‌కత: పశ్చిమబెంగాల్ అసెంబ్లీ ఎన్నికల్లో అఖండ మెజారిటీ సాధించిన ముఖ్యమంత్రి, తృణమూల్ కాంగ్రెస్ అధినేత్రి మమతా బెనర్జీ శుక్రవారం ఆ పార్టీ శాసనసభా పక్షం నేతగా తిరిగి ఎన్నికయ్యారు. ఎమ్మెల్యేలంతా ఆమెను ఏకగ్రీవంగా ఎన్నుకున్నారు. అనంతరం ఆమె ప్రమాణ స్వీకారోత్సవం గురించి మాట్లాడేందుకు రాజ్‌భవన్‌కు వెళ్లి గవర్నర్‌తో భేటీ అయ్యారు.