ముంబయి: బుధవారం సెన్సెక్స్‌ 128 పాయింట్లు లాభపడి 27,915 వద్ద ముగిసింది. నిఫ్టీ 37 పాయింట్ల లాభంతో 8,565 వద్ద ముగిసింది. దేశీయ మార్కెట్లు లాభాలతో ముగిశాయి. డాలర్‌తో రూపాయి మారకం విలువ రూ. 67.18 వద్ద కొనసాగుతోంది.

దిల్లీ: ఎపికి ప్రత్యేక హోదా కోసం ఎంపీ కెవిపి రామచంద్రరావు ప్రవేశపెట్టిన ప్రైవేటుబిల్లుకు ఆమోదం తెలపాలని కాంగ్రెస్‌ పార్టీ రాజ్యసభ సభ్యులకు విప్‌ జారీ చేసింది. శుక్రవారం వరకూ సభకు తప్పనిసరిగా హాజరుకావాలని పార్టీ ఆదేశించింది. కేవీపీ ప్రైవేటు బిల్లు శుక్రవారం రాజ్యసభ ముందుకు వచ్చే అవకాశముంది.

దిల్లీ: భారత హాకీ క్రీడాకారుల్లో దిగ్గజంగా పేరొందిన మహ్మద్ షాహిద్ (56) అనారోగ్యంతో బాధపడుతూ బుధవారం తుదిశ్వాస విడిచారు. గత నెల 29న తీవ్రమైన కడుపునొప్పి రావడంతో ఆయనను బెనారస్‌లోని ఓ ఆస్పత్రిలో చేర్పించారు. పరిస్థితి విషమించడంతో ఆ తర్వాత గుర్గావ్‌లోని ఓ కార్పొరేట్ ఆస్పత్రిలో చేర్పించారు. ఆయన వైద్యఖర్చుల కోసం కేంద్ర ప్రభుత్వం 10 లక్షల రూపాయలు విడుదల చేసింది.

దిల్లీ: రాష్ట్ర విభజన సందర్భంగా పార్లమెంటు సాక్షిగా ఎపికి ఇచ్చిన హామీలను మరచిపోవద్దని కాంగ్రెస్ ఎంపీ కెవిపి రామచంద్రరావు కేంద్ర ఆర్థికమంత్రి అరుణ్‌జైట్లీకి లేఖ రాశారు. ప్రత్యేక హోదాపై పార్లమెంటులో తాను ప్రవేశపెట్టిన బిల్లును ఆమోదించేలా మద్దతు పలకాలని ఆయన కోరారు. అన్ని రంగాల్లో ఎపి అభివృద్ధి చెందాలంటే ప్రత్యేకహోదా ఇవ్వాలని ఆయన తన లేఖలో పేర్కొన్నారు.