విశాఖపట్నం, మార్చి 22: పన్ను బకాయిలు కొండల్లా పేరుకుపోతున్నాయి. ఆస్తిపన్ను చెల్లించాలంటూ ఎన్ని నోటీసులిచ్చినా స్పందన కానరావట్లేదు. దీంతో మొండి బకాయిల వసూలు ఒక్కటే మార్గమని మహా విశాఖ నగరపాలక సంస్థ (జివిఎంసి) అధికారులు తలపోశారు. దీంతో గాంధీగిరీని అశ్రయించే పరిస్థితులు నెలకొన్నాయి. విశాఖలో మంగళవారం చోటుచేసుకున్న సంఘటన పన్నుల వసూళ్లలో స్థానిక సంస్థలు ఎదుర్కొంటున్న ఇబ్బందులను కళ్లకు కట్టింది.

విజయవాడ: ఏపిలోని పలు ప్రాంతాల్లో మంగళవారం కూడా అధిక ఉష్ణోగ్రతలు నమోదయ్యాయి. వేడిగాలులు వీస్తున్నందున జనం రోడ్డెక్కేందుకు భయపడుతున్నారు. చాలాచోట్ల పగటిపూట రహదారులపై ట్రాఫిక్ తగ్గుముఖం పట్టింది. అనంతపురం, నందిగామలో అత్యధికంగా 43డిగ్రీల ఉష్ణోగ్రత నమోదైంది. కృష్ణా, తూర్పు గోదావరి, గుంటూరు జిల్లాల్లో వడగాలులు వీచే అవకాశమున్నట్లు అధికారులు వెల్లడించారు.

హైదరాబాద్: ఏపి అసెంబ్లీ సమావేశాలను ఈనెల 26కి వాయిదా వేస్తున్నట్లు స్పీకర్ కోడెల మంగళవారం సభలో ప్రకటించారు. హోళీ, గుడ్‌ఫ్రైడే సెలవుల కారణంగా మూడు రోజులపాటు అసెంబ్లీని వాయిదా వేశారు. ఈరోజు సభలో ముఖ్యమంత్రి చంద్రబాబు జలసంరక్షణ విధానం, సాగునీటి ప్రాజెక్టులు, నదుల అనుసంధానం గురించి మాట్లాడారు.

కడప: చిట్టీల పేరిట వసూలు చేసిన కోటి రూపాయల నగదుతో ప్రభావతి అనే మహిళ ఉడాయించిన సంఘటన రైల్వే కోడూరులో మంగళవారం వెలుగులోకి వచ్చింది. అందరితోనూ నమ్మకంగా ఉంటూ ఆ మహిళ భారీగా డబ్బులు వసూలు చేసి, ఇపుడు ఆచూకీ లేకుండా పోయిందని బాధితులు పోలీసులకు ఫిర్యాదు చేశారు. ప్రభావతిని పట్టుకునేందుకు పోలీసులు గాలింపు చర్యలు ప్రారంభించారు.