హైదరాబాద్, మే 28: పోషకాహార లోపం విభిన్న రూపాల్లో వ్యవస్థలపై తీవ్ర ప్రభావం చూపుతుండగా, సమస్యను అధిగమించేందుకు సమాజంలోని అన్ని వర్గాల నుండి సహకారం తప్పనిసరని ఆంధ్రప్రదేశ్ శాసనసభ స్పీకర్ కోడెల శివప్రసాదరావు పేర్కొన్నారు. ఈ విషయంలో ప్రపంచవ్యాప్తంగా యునిసెఫ్ చేస్తున్న కృషి అభినందనీయమని చెప్పారు.

రాజమహేంద్రవరం, మే 28: మాజీ మంత్రి ముద్రగడ పద్మనాభం మర్యాదపూర్వక కృతజ్ఞతా పర్యటన కొనసాగుతోంది. ఇప్పటి వరకూ రాష్ట్రంలోపల జరిగిన ఈ పర్యటన..ఇప్పుడు హైదరాబాద్‌లో మొదలైంది. ముద్రగడ వారం రోజులపాటు హైదరాబాద్‌లోనే మకాం ఉండి పలువురు నేతలను మర్యాదపూర్వకంగా కలిసి తన ఉద్యమానికి నైతిక బలాన్నిచ్చినందుకు, సంఘీభావం ప్రకటించినందుకు కృతజ్ఞతలు తెలియజేసే పనిలో నిమగ్నమయ్యారు.

అనంతపురం సిటీ, మే 28 : ఆంధ్రప్రదేశ్ లా సెట్-2016 యుజి, పిజి ప్రవేశ పరీక్షలకు 12,368 మంది హాజరైనట్లు లా-సెట్ రాష్ట్ర కన్వీనర్ పుల్లారెడ్డి తెలిపారు. అనంతపురంలోని శ్రీకృష్ణదేవరాయలు యూనివర్శిటీ ఆవరణలో ఉన్న లాసెట్ కార్యాలయంలో శనివారం ఆయన విలేఖరుల సమావేశంలో వివరాలు వెల్లడించారు. రాష్ట్ర వ్యాప్తంగా జరిగిన లా సెట్-2016 పరీక్ష ప్రశాంతంగా జరిగిందని తెలిపారు.

విశాఖపట్నం, మే 28: కోస్తాంధ్రలో శనివారం ఉష్ణోగ్రతలు స్వల్పంగా తగ్గాయి. కొన్ని చోట్ల వర్షపాతం నమోదు అయినట్లు విశాఖలోని తుపాను హెచ్చరికల కేంద్రం అధికారులు శనివారం రాత్రి తెలిపారు. ఆదివారం కూడా చాలా చోట్ల సాధారణ ఉష్ణోగ్రతలు నమోదు అవుతాయని తెలిపారు. బాపట్లలో 41 డిగ్రీలు, నెల్లూరు 41.3, మచిలీపట్నంలో 33.6, తునిలో 32.6, కళింగపట్నంలో 36.6, గన్నవరంలో 37.6 డిగ్రీలు నమోదైంది.