విజయవాడ, జనవరి 13: రాష్ట్ర ప్రజలకు ఆంధ్రప్రదేశ్ ముఖ్యమంత్రి చంద్రబాబు సంక్రాంతి శుభాకాంక్షలు తెలిపారు. తెలుగు రాష్ట్రాల ప్రజలు, దేశ, విదేశాల్లోని తెలుగువారు భోగి, సంక్రాంతి, కనుమ వేడుకలను ఘనంగా చేసుకోవాలని కోరారు. రాష్ట్రంలోని కోటి 80 లక్షల పేద కుటుంబాల వారు పెద్ద పండుగను సంతోషంగా చేసుకోవాలన్నదే తమ అభిమతమని, గత ఏడాది వలనే ఈ ఏడాది కూడా వారికి చంద్రన్న సంక్రాంతి కానుకను అందజేశామన్నారు.

హైదరాబాద్, జనవరి 13: ఆంధ్రప్రదేశ్‌లో రాష్టవ్య్రాప్తంగా 13 జిల్లాల్లో 14 నవజాత శిశు కేంద్రాలు (ఎర్లీ ఇంటర్వెన్షన్ సెంటర్లు) నెలకొల్పాలని ప్రభుత్వం నిర్ణయించింది. ప్రతి కేంద్రానికి కోటి ఆరు లక్షలు చొప్పున 14 కేంద్రాలకు 14.84 కోట్లు విడుదల చేసింది. ఈ కేంద్రాలకు సొంత భవనాలను నిర్మిస్తారు. కేంద్రప్రభుత్వం ప్రతిపాదించిన రాష్ట్రీయ బాల స్వాస్థ్య కార్యక్రమం కింద వీటిని నిర్మిస్తారు.

విజయవాడ, జనవరి 13: సంక్రాంతి పర్వదినం సందర్భంగా ప్రభుత్వ ఉద్యోగులకు రాష్ట్ర ప్రభుత్వం ఒక తీపి వార్త అందించింది. ఎన్టీఆర్ వైద్య సేవ ట్రస్ట్ ఆధ్వర్యంలో ఉద్యోగులందరికీ పూర్తి స్థాయిలో ఈ నెల 16వ తేదీ నుంచి వైద్య సేవలు లభించబోతున్నాయి. సమన్వయం, సమాచారం లోపం వలన ఎవరికైనా హెల్త్‌కార్డులు లభించకపోతే దశలవారీగా అందేలా ముఖ్యమంత్రి ఆదేశాలు జారీ చేశారు.

హైదరాబాద్, జనవరి 13: ఆంధ్రప్రదేశ్ రాష్ట్ర వ్యాప్తంగా ఈ నెల 17న పల్స్‌పోలియో కార్యక్రమం చేపడుతున్నామని ఆరోగ్య కుటుంబ సంక్షేమ కమిషనర్ తెలిపారు. బుధవారం ఈ మేరకు ఒక ప్రకటన జారీ చేస్తూ, భారత్ నుండి పోలియో పూర్తిగా నిర్మూలించినప్పటికీ, సమీప దేశాల్లో ఇది ఉండటం వల్ల ముందు జాగ్రత్త చర్యగా పల్స్‌పోలియో చేపడుతున్నట్టు వెల్లడించారు.